საპატრიარქოს განცხადებით, ოკუპირებულ ცხინვალის ე.წ საპრეზიდენტო არჩევნებში ალან გაგლოევისთვის გამარჯვების მილოცვა, იმ ფონზე, როდესაც მართლმადიდებელ ეკლესიებს შორის "ურთიერთობების გამყარების ყოველი მცდელობა უმნიშვნელოვანესია" ვითარებას ართულებს.

"მოსკოვისა და სრულიად რუსეთის პატრიარქის აღნიშნული წერილი ბადებს გაუგებრობას, რადგან რუსეთის ეკლესია აღიარებს საქართველოს ეკლესიის იურისდიქციას ე.წ. სამხრეთ ოსეთის ტერიტორიაზე. საქართველოს ეკლესია, საქართველოს სახელმწიფო და საერთაშორისო საზოგადოებაც ცნობს საქართველოს საერთაშორისოდ აღიარებულ საზღვრებს, ხოლო ოკუპირებულ ტერიტორიაზე მოქმედ ადმინისტრაციებს მიიჩნევს საოკუპაციო რეჟიმად", — ნათქვამია განცხადებაში.

რუსეთის საპატრიარქოს ოფიციალურ გვერდზე მილოცვა 13 მაისს გამოქვეყნდა. კირილმა გაგლოევს "სამხრეთ ოსეთის ხალხისთვის მოსალოდნელ მსახურებაში სულიერი და ფიზიკური სიძლიერე, მშვიდობას და ღვთის უხვი წყალობა უსურვა".

ოკუპირებულ ცხინვალში დე ფაქტო არჩევნების მეორე ტური 8 მაისს ჩატარდა.