საზოგადოებრივი მაუწყებლის ახალმა მენეჯმენტმა, ვასილ მაღლაფერიძის დირექტორად არჩევის (6 იანვარი) შემდეგ, არხზე 48 ადამიანი დაასაქმა 29-სთან კი თანამშრომლობა შეწყვიტა. 2017 წლის 1 იანვრიდან 13 აპრილის პერიოდში არხზე დასაქმებული თანამშრომლების შესახებ რაოდენობა On.ge-ს საზოგადოებრივმა მაუწყებლმა საჯარო ინფორმაციის სახით მიაწოდა.

ახალი მენეჯმენტის პირობებში 12 კორესპონდენტი, ექვსი მომღერალი, ოთხი ოპერატორი, ახალი ამბების დაგეგმვის სამი რედაქტორი, სამი ვებ-რედაქტორი, ორი ანალიტიკოსი და კიდევ 18 ადამიანი სხვადასხვა თანამდებობაზე დაასაქმეს. გათავისუფლებულ თანამშრომლებს შორის არის სამი კორესპონდენტი, ორი მძღოლი, ორი ოპერატორი და სხვა პოზიციაზე მომუშავე 22 თანამშრომელი.

მოწოდებული საჯარო ინფორმაციით ირკვევა, რომ პირველი იანვრიდან 13 აპრილის ჩათვლით, არხზე სულ 54 ადამიანი დასაქმდა, 31-თან კი თანამშრომლობა შეწყდა. ამით მაუწყებლის თანამშრომლების რაოდენობა 13-ით გაიზარდა და 1 151-ს გაუტოლდა.

ვასილ მაღლაფერიძემ გენერალურ დირექტორად არჩევიდან ერთი თვის შემდეგ მაუწყებლის განვითარების ხედვის პრეზენტაცია გამართა. მაშინ მაღლაფერიძე ამბობდა, რომ თანამშრომლების რაოდენობის ოპტიმიზაცია იგეგმებოდა, თუმცა, მისი დირექტორობის თითქმის 100 დღის განმავლობაში ეს რაოდენობა გაიზარდა.

On.ge-ს მიღებული და გათავისუფლებული თანამშრომლების სახელფასო ანაზღაურების შესახებაც ჰქონდა ინფორმაცია გამოთხოვილი. საზოგადოებრივმა მაუწყებელმა ეს ინფორმაცია არ გასცა, საჯარო ინფორმაციის გაცემაზე პასუხისმგებელმა პირმა გადაწყვეტილება ასე ახსნა: "ინფორმაციის გაცემამ შესაძლოა, გამოიწვიოს გარკვეულ პირთა იდენტიფიცირება და ამდენად, მათი პერსონალური მონაცემების გასაჯაროება."