TV პირველის წამყვანი, ვიკა ბუკია სოციალურ ქსელში ავრცელებს შეტყობინებას, სადაც უცნობი პირი მას ემუქრება. წამყვანი On.ge-სთან აცხადებს, რომ შინაგან საქმეთა სამინისტროდან და სპეციალური საგამოძიებო სამსახურიდან უკვე დაუკავშირდნენ.

"გუშინ მე აღმოვაჩინე ეს შეტყობინებები, მაგრამ გამოგზავნილია 3-4 მარტს. სქრინშოთი მიმოწერას სრულად არ ასახავს. კიდევ არის მუქარა ჩემი ოჯახის წევრების მისამართით. ასევე, მირეკავდა", — ამბობს ვიკა ბუკია.

როგორც On.ge-ს სპეციალურ საგამოძიებო სამსახურში განუცხადეს, ჟურნალისტი დაბარებულია გამოკითხვაზე.

მედიის ადვოკატირების კოალიცია აცხადებს, რომ სახელმწიფო ვალდებულია დაიცვას ჟურნალისტები, შეაჩეროს საფრთხეები, რაც მათი სიცოცხლის ხელშეუხებლობას და პროფესიულ საქმიანობის თავისუფლებას უკავშირდება.

"ჟურნალისტებსა და სხვა მედია აქტორებზე თავდასხმასა და მათ დაშინებას გარდაუვალი მსუსხავი ეფექტი აქვს გამოხატვის თავისუფლებაზე. ეს ეფექტი კიდევ უფრო მძაფრია, თუ თავდასხმებისა და დაშინების ფაქტებს თან ახლავს დამნაშავეთა დაუსჯელობა. აღნიშნულის გათვალისწინებით,

კოალიცია მიმართავს სპეციალურ საგამოძიებო სამსახურს სწრაფი და ეფექტური გამოძიებით დაიცვას ჟურნალისტთა უფლებები", — აცხადებს კოალიცია.