მარიუპოლის მერის მრჩეველის, პეტრო ანდრიუშჩენკოს განცხადებით, აზოვსტალს ოკუპანტები ბომბავენ და თავს ესხმიან. მისივე თქმით, საომარი მოქმედებები ქარხნის გალავნის შიგნით მიმდინარეობს.

"მარიუპოლში თავისუფლების ბოლო 11 კვადრატული კილომეტრი ჯოჯოხეთად იქცა", —ამბობს ის.

ანდრიუშჩენკო ამბობს, რომ თუ მსოფლიოში ჯოჯოხეთია, ის აზოვსტალია. მან აღნიშნა, რომ ქარხნის მახლობლად მდებარე საცხოვრებელი უბნებიდან "გაფრთხილების გარეშე სასწრაფოდ დამოუკიდებლად მოუწიათ ევაკუაცია".

ქარხნის შიგნით მებრძოლებმა ოთხშაბათს განაცხადეს, რომ რუსულმა ძალებმა მისი პერიმეტრი დაარღვიეს.

გუშინ, 4 მაისს უკრაინსკა პრავდამ წყაროებზე დაყრდნობით გაავრცელა ინფრომაცია, რომ რუსი სამხედროები აზოვსტალის ქარხანაში შეიჭრნენ. მედია წერდა, რომ უკრაინელ მებრძოლებთან კავშირი ვერ მყარდება.

აზოვის პოლკის მეთაურის, დენის პროკოპენკოს განცხადებით, აზოვსტალში მდგომარეობა უკიდურესად მძიმეა, თუმცა ჯარისკაცები ბრძანების შესრულებას აგრძელებენ და დაცვას ინარჩუნებენ. მეთაური მადლობას უხდის მთელ მსოფლიოს მარიუპოლის მხარდაჭერისთვის.