ოკუპანტების ტყვეობიდან გათავისუფლებული მესაზღვრე კუნძულ ზმეინიდან, რომელმაც რუსული სამხედრო გემი "ნა ხ*ი" გაუშვა და დანებებაზე უარი თქვა ამბობს, რომ რუსებმა არ იცოდნენ ვინ იყო ამ სიტყვების ავტორი, წინააღმდეგ შემთხვევაში მას სახლში არ დააბრუნებდნენ.

"ეს ვინ თქვა, მათ არ იცოდნენ. ეს კარგი იყო, რადგან ვფიქრობ, რომ ამ შემთხვევაში კარგად არ მომექცეოდნენ და სახლში ვერ დავბრუნდებოდი", – განაცხადა რომან გრიბოვმა.

ზმეინის დამცველი იხსნებს, რომ ტყვეობაში ყოფნისას არ იცოდა რა მოჰყვა მის სიტყვებს და რამხელა მნიშვნელობის გახდა არამხოლოდ უკრაინელებისთვის, არამედ მსოფლიოსთვის.

"კაცმა, რომელიც ტყვეების გაცვლის პროცესში მონაწილეობდა, მითხრა — იცი, რომ ლეგენდარული ფრაზის ავტორი შენ ხარ? თავიდან ვერ მივხვდი რაზე იყო საუბარი. სახლს რომ მივუახლოვდი, მივხვდი. მართალი გითხრათ, უხერხული იყო. მე უბრალო ადამიანი ვარ და ეს დიდი ყურადღებაა. ეს ფრაზა ხალხის გუნება-განწყობილებას ამაღლებს, ამიტომ დედაჩემმა გაიგო და მხარი დაუჭირა. რა თქმა უნდა, ეს არც ისე კარგია, რადგან უხამსობაა, მაგრამ მე ზრდასრული ვარ და შემიძლია ასე გამოვხატო", — ამბობს გრიბოვი.

მესაზღვრის თქმით, ოკუპანტები ტყვეებს აწამებდნენ როგორც ფსიქოლოგიურად, ასევე ფიზიკურად.

"ძაღლებზე უარესად გვექცეოდნენ, პატიმრების "ხალათში" ვიყავით ჩაცმული, მორალურად გაგვანადგურეს. ყველას ერთნაირად ექცეოდნენ, არ აინტერესებდათ, ვინ იყო მათ წინ — სამხედრო, კაცი, ქალი, მღვდელი", — ამბობს ის.

გრიბოვის თქმით, რუსები მათ არწმუნებდნენ, რომ კიევი უკვე აღებული იყო და დასაბრუნებელი არსად ჰქონდათ.

რომან გრიბოვი რუსეთის ტყვეობიდან 29 მარტს გაათავისუფლეს და სახლში დაბრუნდა. მესაზღვრეს მიენიჭა ჯილდო "ჩერკასის რეგიონში გაწეული მომსახურებისთვის".

რა მოხდა კუნძულ ზმეინიზე

25 თებერვალს ცნობილი გახდა, რომ რუსები უკრაინული კუნძულის აღებას ცდილობდნენ. მალევე გავრცელდა ჩანაწერიც, სადაც ისმოდა, რომ რუსული სამხედრო გემი მოუწოდებდა კუნძულზე მყოფ უკრაინელ მესაზღვრეებს დანებებულიყვნენ, თუმცა პასუხად მიიღეს: "რუსულო სამხედრო გემო, იძი ნა ხ*ი".

ფრაზა მალევე იქცა წინააღმდეგობის სიმბოლოდ და მსოფლიოს მასშტაბით არაერთი საპროტესტო აქციის სლოგანი გახდა.

25 თებერვალს სხვადასხვა წყაროდან გავრცელდა ინფრომაცია იმაზე, რომ რუსებმა კუნძული დაბომბეს და მცველები დაიღუპნენ. პრეზიდენტმა, ვოლოდიმირ ზელენსკიმაც განაცხადა, რომ ჯარისკაცები გმირულად დაიღუპნენ, მაგრამ კუნძული არ დათმეს და ყველას გმირის წოდება მიანიჭა.

თუმცა მოგვიანებით, ინფორმაცია დაზუსტდა და გაირკვა, რომ მესაზღვრეები რუსებს ტყვედ ჰყავდათ აყვანილი.