უკრაინის ეროვნული გვარდიის მე-12 ოპერატიული ბრიგადის მეთაურმა განაცხადა, რომ აზოვსტალის ფოლადის ქარხანაში 200-მდე ადამიანია დარჩენილი, მათ შორის 20 ბავშვია. მისი თქმით, გუშინდელი ევაკუაციის შემდეგ მტერმა ქარხანას კვლავ შეუტია და ყველა სახის იარაღის გამოყენება დაიწყო.

მეთაური ამბობს, რომ მათი საველე ჰოსპიტალი რამდენიმე დღის წინ დაიბომბა და ახლა ყველაზე დიდი პრობლემა დაჭრილი სამხედროების მკურნალობაა. მან ასევე ისაუბრა დარჩენილი მებრძოლების გაყვანის აუცილებლობაზე.

"სამხედროებს სამედიცინო დახმარებას უკიდურესად მძიმე პირობებში ვუწევთ. ამჟამად 500-მდე მათგანია აზოვსტალში. მათი დაზიანებები სხვადასხვა სიმძიმისაა. ეს არის ყველაზე დიდი პრობლემა, რომელიც უნდა მოგვარდეს", — ამბობს ის.

30 აპრილს აზოვსტარლიდან მოსახლეობის ევაკუაცია დაიწყო. უკრაინის პრეზიდენტის, ვოლოდიმირ ზელენსკის განცხადებით ტერიტორიიდან გაიყვანეს 100-მდე ადამიანი, თუმცა ქარხანაში კვლავ რჩებიან მშვიდობიანი მოქალაქეები და სამხედროები.

მარიუპოლი ომის დაწყების პირველივე დღეებიდან ალყაშია. რუსული დაბომბვების გამო განადგურებულია ქალაქის ინფრასტრუქტურა და დაღუპულია ათასობით მშვიდობიანი მოქალაქე. დიდი ხნის განმავლობაში, საოკუპაციო ძალები აბრკოლებდნენ მწვანე დერეფნების მუშაობას და ჰუმანიტარული ტვირთის შეტანას.