პარლამენტში, ჯანდაცვის კომიტეტზე თამბაქოს კონტროლის შესახებ საკანონმდებლო ცვლილებების პაკეტს მეორე მოსმენით განიხილავენ. პროექტის ინიციატორის, გუგული მაღრაძის თქმით, თუკი რესტორნის მეპატრონე მომხმარებელს მოწევის უფლებას მისცემს, მიუხედავად იმისა, რომ საწინააღმდეგო ნიშანი გაკრული იქნება, ამ შემთხვევაში მეპატრონე დაჯარიმდება 500 ლარით, განმეორებით შემთხვევაში კი 1 000 ლარით. კითხვაზე, თუ ვინ დააჯარიმებს და საიდან გახდება დარღვევის შესახებ ცნობილი, გუგული მაღრაძემ თქვა, რომ შეიძლება გარკვეული შემთხვევები კონტროლს მიღმა დარჩეს:

"ისეთი მგზავრებიც ხომ არსებობენ, რომლებსაც ავტობუსში არ მოუწია კონტროლმა და უბილეთოდ შერჩათ ერთხელ და ორჯერ მგზავრობა".

კომიტეტის თავმჯდომარის, აკაკი ზოიძის თქმით, მთავრობასთან კონსულტაციები გაიარეს ამ თემაზე და გადაწყვიტეს, რომ ვალდებულება ექნება ორგანიზაციის ხელმძღვანელობას და გააკონტროლებს შინაგან საქმეთა სამინისტრო:

"ამის პროაქტიულ რეაგირებაზე შსს იქნება პასუხისმგებელი, მათ შორის საზოგადოებრივ თავშეყრის ადგილებში და შენობებში. ერთ შემთხვევაში, როდესაც გაირკვევა, მაგალითად რეაგირებით: დაურეკავს ვინმე მოქალაქე, რომ ვიღაც ეწევა, მოვა პატრული და გაარკვევს უთხრა თუ არა მეპატრონემ მოწევის აკრძალვაზე. ამ შემთხვევაში დაჯარიმდება მეპატრონე. სხვა დროს, პატრული პროაქტიულად ივლის და ნახავს საფერფლეს, ან სიგარეტის სუნს, ან კვამლს."