იაპონიაში კაფე გაიხსნა, სახელად Manuscript Writing Cafe, რომლის სტუმრებიც თანამშრომლებს ფულს უხდიან, რათა სამუშაოს დასასრულებლად მათზე მაქსიმალური ზეწოლა მოახდინონ.

კაფე ტოკიოს ერთ-ერთ რაიონში მდებარეობს და მას ყოველდღიურად სტუმრობენ მხატვრები, მწერლები, რედაქტორები და სხვა ადამიანები, რომლებსაც დაწყებული სამუშაოს დასრულება სურთ. კაფეს თანამშრომლები სტუმრებს ყავითა და ჩაით ამარაგებენ და თან აკონტროლებენ, რომ დავალების დაუსრულებლად კაფე არავინ დატოვოს.

კაფე შემდეგი სისტემის მიხედვით მუშაობს: სტუმრები ყოველი მისვლისას ვალდებულები არიან, რომ დღის გეგმა და მთავარი მიზანი დასახონ. ამ ყველაფერს კი თანამშრომლები ინიშნავენ და რეგულარულად აკონტროლებენ.

კაფეს სტუმრებმა თავად უნდა შეარჩიონ, როგორი კონტროლი სურთ: რბილი, საშუალო თუ მკაცრი. რბილი კონტროლის შემთხვევაში, სტუმრებს დღის ბოლოს ეკითხებიან შეასრულეს თუ არა სამუშაო. საშუალო კონტროლისას სტუმრებს ყოველ საათში ერთხელ ამოწმებენ. ხოლო თუ მომხმარებელი მკაცრ კონტროლს აირჩევს, მას კაფეს თანამშრომლები მთელი დღის განმავლობაში თავზე დაადგებიან და მუშაობას მუდმივად გაუკონტროლებენ.

მთავარი წესი ის არის, რომ დავალების დასრულებამდე კაფე არავინ დატოვოს. ვინც ამ წესს დაარღვევს, მისი სახელი დაფაზე დაიწერება და სხვები დაინახავენ, თუ ვინ დატოვა კაფე სამუშაოს დასრულების გარეშე. კაფეში ნახევარი საათით გაჩერება 1 დოლარი ღირს, ამის შემდეგ კი ყოველი დამატებითი საათი 2,34 დოლარი ჯდება. კაფეს მეპატრონეს თქმით, ეს კიდევ ერთი დამატებითი მოტივაციაა, რათა ადამიანებმა თავიანთი სამუშაო ადრე დაასრულონ.