ცნობილმა ინგლისელმა მომღერალმა, ჰარი სტაილსმა, ამერიკული ჟურნალისთვის მიცემულ ინტერვიუში ისაუბრა, რატომ ამჯობინებდა წინათ, პირადი ცხოვრება არ გაესაჯაროებინა.

სტაილსი მალე თავისი რიგით მესამე სტუდიურ ალბომს, Harry's House, გამოუშვებს. სწორედ ახალ ჩანაწერებს შეეხებოდა ინტერვიუს დიდი ნაწილი, თუმცა, პოპვარსკვლავმა ასევე ილაპარაკა იმ შეკითხვებზე, რომლებიც მის ფანებს წლების განმავლობაში ჰქონდათ.

მომღერლის თქმით, ჯგუფ One Direction-ში ყოფნისას ლეიბლთან გაფორმებული კონტრაქტი ეგრეთ წოდებულ სისუფთავის პუნქტსაც ითვალისწინებდა, რომლის დარღვევის შემთხვევაში მისი კარიერა დასრულდებოდა.

"დიდი ხნის განმავლობაში, ერთადერთი, რაც მართლა მე მეკუთვნოდა, ჩემი სექსუალური ცხოვრება იყო", — ამბობს ჰარი, — "ამის მრცხვენოდა. მრცხვენოდა იმის, რომ ხალხმა იცოდა, სექსი მქონდა — რომ აღარაფერი ვთქვათ იმაზე, იცოდნენ, ვისთან მქონდა.

"თუმცა, იმ აზრამდე მივედი, რომ ვფიქრობდი, რატომ უნდა მრცხვენოდეს? 26 წლის მარტოხელა კაცი ვარ. დიახ, მე სექსი მაქვს".

პირადი ცხოვრების საიდუმლოდ შენახვით გამოწვეული სტრესი იმდენად დიდი იყო, რომ, სტაილსის თქმით, ცრემლები წასკდა, როცა Columbia-სთან გაფორმებულ კონტრაქტში მსგავსი "სისუფთავის პუნქტი" ვერ ნახა.

"ვიგრძენი, რომ თავისუფალი ვიყავი", — იხსენებს მომღერალი.

სტაილსმა ასევე აღნიშნა, რატომ არ სურს, საჯაროდ საუბრისას თავისი სექსუალობა ტერმინით განსაზღვროს.

"ჩემს მეგობრებთან ამაზე ღიად ვსაუბრობ, თუმცა, ეს ჩემი პირადი გამოცდილებაა. მხოლოდ ჩემი", — ამბობს იგი და დასძენს, რომ სექსუალობის ტერმინით მოხსენიება მოძველებული ჩვეულებაა.

"ყველას მიღებისა და უფრო ღიად საუბრისკენ მისწრაფების არსიც ხომ ისაა, რომ ამას [სექსუალობას] მნიშვნელობა არ აქვს. ეს ნიშნავს, რომ აუცილებელი არაა, ყველაფერს სახელი დაარქვა".