რუსეთის უკრაინაში შეჭრის შემდეგ, ფინეთმა და შვედეთმა NATO-ში გაწევრიანების სურვილი გამოთქვეს. რა თქმა უნდა, ეს აზრი აღფრთოვანებას არ იწვევს კრემლში, თუმცა საერთაშორისო მედიებს თუ დავეყრდნობით, ორი ქვეყანა განაცხადს მალე გააკეთებს.

დეტალები: 11 აპრილს The Times-მა გაავრცელა ინფორმაცია, რომ ფინეთი და შვედეთი NATO-ში გაწევრიანების მოთხოვნას აპირებდნენ.

  • ოფიციალურმა პირებმა აღნიშნეს, რომ ეს გადაწყვეტილება რუსეთის მიერ უკრაინაში ომის დაწყების პირდაპირი შედეგი იყო.
  • შვედეთის პრემიერმინისტრმა, მაგდანელა ანდერსონმა 13 აპრილს აღნიშნა, რომ უსაფრთხოების ლანდშაფტები მთლიანად შეიცვალა და ახლა არსებობს მხოლოდ "24 თებერვლამდე და შემდეგ".
  • ფინეთის პრემიერმა, სანა მარინმა კი თქვა, რომ მიუხედავად მოსკოვის გაბრაზების რისკისა, მისი ქვეყანა NATO-ში გაწევრიანებაზე გადაწყვეტილებას "ძალიან სწრაფად" მიიღებდა.

რატომ არის ეს მნიშვნელოვანი: ეს ისტორიული გადაწყვეტილებაა — ნეიტრალური ქვეყნების სურვილი, რომ NATO-ს შეურეთდნენ უკვე ცვლის პოლიტიკურ კლიმატს.

  • მათი გაწევრიანება ვლადიმერ პუტინის შიშს NATO-ს გაფართოებასთან დაკავშირებით რეალობად აქცევს;
  • გააადვილდება რეაგირებას ბალტიისპირეთში რუსული ძალების ნებისმიერ შეჭრაზე;
  • რუსეთი კიდევ უფრო გაძლიერებული ნატოს პირისპირ აღმოჩნდება, რადგან მას საზღვაზე ეყოლება ალიანსის წევრი ქვეყანა.

ამასობაში, რუსეთი პატარა ქვეყნების წინააღმდეგ მუქარას და მათთვის NATO-ში გაწევრიანების გზების ჩაკეტვას აგრძელებს. სკანდინავიური ქვეყნების სურვილს კრემლი გაფრთხილებით გამოეხმაურა.

  • 20 აპრილს რუსეთის საგარეო საქმეთა სამინისტროს პრესსპიკერმა განაცხადა, რომ ამ ქვეყნის ლიდერებს უნდა ესმოდეთ, ასეთი ნაბიჯების შედეგები რუსეთთან ორმხრივ ურთიერთობებსა და ევროპის უსაფრთხოების არქიტექტურაზე.

თუმცა ორივე ქვეყანას NATO-სგან პოზიტიური სიგნალები აქვს. ამასთან, მათი სამხედრო აღჭურვილობა სრულადაა თავსებადი ალიანსის წევრებთან და ისინი აქტიურად იღებდნენ მონაწილეობას ალიანსის წვრთნებში.

  • NATO-ს გენერალური მდივანი, იენს სტოლტენბერგი აცხადებს, რომ თუ ორი ქვეყანა ამას გადაწყვეტს, მარტივად შეუძლიათ ალიანსში გაწევრიანება, რადგან NATO-ს სტანდარტებს აკმაყოფილებენ.

ბოლო ინფორმაციით, ფინეთი და შვედეთი NATO-ში გაწევრიანებაზე განცხადების გაკეთებას მაისში გეგმავენ.