საფრანგეთის პრეზიდენტობის კანდიდატმა ემანუელ მაკრონმა BBC-სთან საუბრისას განაცხადა, რომ ევროკავშირმა რეფორმების გატარება უნდა დაიწყოს, თორემ საფრანგეთმა მისი პრეზიდენტობის შემთხვევაშიც შესაძლოა დატოვოს გაერთიანება.

მაკრონი, თავის კონკურენტ მარინ ლე პენისგან განსხვავებით, კამპანიის დაწყებიდან აფიქსირებდა, რომ ევროკავშირში დარჩენის მომხრე იყო.

"მე ევროკავშირში ყოფნის მომხრე ვარ, რადგან გაერთიანებაში დარჩენა ფრანგი ხალხისთვის და გლობალიზაციისთვის უმნიშვნელოვანესია, თუმცა ჩვენი მოსახლეობა ევროკავშირის დიფუნქციის გამო განრისხებულია".

მაკრონის თქმით, თუ ევროკავშირი არ გააქტიურდება, ეს მისი წევრი ქვეყნებისადმი ღალატის ტოლფასი იქნება. ის დასძენს, რომ მიმდინარე მოვლენებმა შეიძლება Frexit (გაერთიანებიდან საფრანგეთის გასვლა) გამოიწვიოს, რაც მას არ სურს.

ფრანგი ამომრჩეველი კვირას, 7 მაისს, არჩევნების მეორე ტურში გადაწყვეტს, ვინ გახდება საფრანგეთის მომავალი პრეზიდენტი.