სახალხო დამცველმა, უჩა ნანუაშვილმა საჯარო დებატებზე ქალთა, შშმ პირთა და ბავშვთა შრომა: პრობლემები და გამოწვევები, განაცხადა, რომ შრომაში ჩართული ბავშვების 63,9 პროცენტი, ანუ დაახლოებით 15,6 ათასი ბავშვი, სახიფათო სამუშაოს ასრულებს:

"სტატისტიკის ეროვნული სამსახურის მიერ ჩატარებული კვლევის მიხედვით, საქართველოში 5-17 წლის ასაკის 571 ათასი ბავშვი ცხოვრობს და აქედან 24,4 ათასი ბავშვთა შრომაშია ჩართული. მათი დიდი ნაწილი - 84 პროცენტი სოფელში ცხოვრობს".

ომბუდსმენის შეფასებით, ბავშვების ასაკთან და ფსიქო-ფიზიკური განვითარების დონესთან შეუსაბამო სამუშაოს შესრულების წამყვანი ფაქტორი სიღარიბეა:

"არასრულწლოვნებს, სოციალური პირობების გაუმჯობესების მიზნით, სეზონურად საკმაოდ მძიმე სამუშაოს შესრულება უხდებათ. აქვე უნდა აღინიშნოს, რომ საკმაოდ ხშირია ბავშვთა შრომის საფუძველზე სკოლის მიტოვების შემთხვევები და ოჯახებში სეზონური სამუშაოების შესრულების მიზეზით სკოლის გაცდენის ფაქტები".