ახალი საქართველოს წევრის, ლევან ხაბეიშვილის, მიერ გამოქვეყნებული ვიდეოს შესახებ, რომელშიც ლისის ტბის მიმდებარე ტერიტორიაზე დამწვარი ხეები ჩანს, ლისი დეველოპმენტმა შინაგან საქმეთა სამინისტროს მიმართა.

კომპანიის განცხადებით, დადგენილია, რომ არსებული ვითარება გამოწვეულია წინა წლებში მომხდარი მინდვრის ხანძრის შედეგად, თუმცა ამ ეტაპზე მათ ხელახლა მიმართეს უწყებას:

"ამ ეტაპზე ისევ მივმართეთ შინაგან საქმეთა სამინისტროს, რათა დაადგინოს მას შემდეგ ხელახლა განმეორდა თუ არა ვანდალური ფაქტი. კომპანია ყოველწლიურად ახორციელებს ათასობით ხის ჩარგვას და მაქსიმალურად ხელს უწყობს ლისის ტბის ტერიტორიის გამწვანებას".

თბილისის მერის განცხადებით, ტერიტორიაზე ხანძარი რამდენიმე წლის წინ მოხდა, რის შემდეგაც მერიამ ადგილზე ახალი ხეები დარგო. ნარმანია განცხადების გამავრცელებლებსაც მოუწოდებს, რომ ადგილზე ხეები დარგონ.