თბილისის სააპელაციო სასამართლოში რუსთავი 2-ის საქმის განხილვაზე მოსამართლემ ნიკა გვარამიას რეპლიკას უპასუხა და შესთავაზა ტესტი, რომელიც მის მიუკერძოებლობას შეამოწმებდა.

ნათია გუჯაბიძემ თქვა, რომ თუ ვიღაცის დაწერილი გადაწყვეტილება მის გადაწყვეტილებას დაემთხვევა, მანტიას გაიხდის და თანამდებობას დატოვებს:

"როდესაც მოვა გადაწყვეტილების გამოცხადების პროცესი, ჩვენ გამოვაცხადებთ დასაბუთებულ გადაწყვეტილებას, თქვენ აქ პაკეტში დალუქული სახით იქონიეთ ის გადაწყვეტილება, ვიღაცის მიერ დაწერილი და საჯაროდ გახსენით, და თუ დაემთხვევა ჩვენს მიერ მიღებული ნებისმიერი გადაწყვეტილება, თქვენი სასარგებლო იქნება თუ თქვენი საწინააღმდეგო, საჯაროდ ვაცხადებ, გავიხდი მანტიას და დავტოვებ ჩემს თანამდებობას, და არა მარტო ამას გავაკეთებ, თქვენ სრული უფლება გექნებათ პირადად ჩემი მისამართით აღძრათ საქმე. თუ გამართლდა თქვენი პოზიცია, მე დავტოვებ ჩემს თანამდებობას, თუ არ გამართლდა, დაინახავთ რომ შეცდომაში შეგყავთ თქვენი თავი, სასამართლო და კიდევ ვინ არ ვიცი".

ნიკა გვარამიამ მანამდე მოსამართლე ნატა ნაზღაიძის რეპლიკაზე, რომ ეს საქმე რუსთავი ორს, საზოგადოებას და "საერთოდ ყველას" დისკომფორტს უქმნიდა, უპასუხა, რომ მისი სიტყვები წულუკიანისა და წინა მოსამართლეების სიტყვებს აგონებდა, რასაც ნაზღაიძემ დაუსაბუთებელი სიტყვები უწოდა.

"ეს ზუსტად ის სიტყვებია რომელსაც წინა მოსამართლე და თეა წულუკიანი გვეუბნებოდა ყოველ დღე. [გვარამიას სიტყვები] არაა დაუსაბუთებელი, წინა სხდომებზე თქვენ არ ბრძანდებოდით და წულუკიანს ალბათ არ უსმენთ, მე კი დარწმუნებული ვარ რომ არამხოლოდ უსმენთ, კითხულობთ კიდეც, მაგრამ, ზუსტად გეუბნებით, რომ ზუსტად ამ ტექსტით გვესაუბრება ყველა მოსამართლე და მთავრობის ყველა წევრი, რომ დისკომფორტს გიქმნით ეს და საზოგადოებისთვისაც საჩქაროა ამის დამთავრება.

არ არის ჩვენთვის საჩქარო ამის დამთავრება, არსად არ გვეჩქარება, ბედნიერები ვართ პროცესები დიდი ხანი რომ გრძელდება. ჩვენზე თუ ზრუნავთ, ძალიან გვასიამოვნებთ თუ პროცესს გადავდებთ რამდენიმე თვით ან სრულიადაც უსასრულოდ, ამას გარდა ჩვენთვის ძალიან მნიშვნელოვანია საკონსტიტუციო სასამართლო რას იტყვის, იმასაც ველოდებით" - თქვა გვარამიამ.

მოსამართლემ ამაზე უპასუხა, რომ მისთვისაც მნიშვნელოვანი იყო საკონსტიტუციო სასამართლოს გადაწყვეტილება, რაზეც გვარამიამ მიუგო, რომ მათი მოქმედებები სხვაზე მეტყველებდა:

"არ ვარ დარწმუნებული, რომ იყოს თქვენთვის მნიშვნელოვანი დაელოდებოდით თქვენც ამ შედეგს. წინააღმდეგ შემთხვევაში გუშინდელ სხდომაზე ხვალ არ ჩანიშნავდით დღევანდელ სხდომას. ერთსა და იმავე მხარეს წარმოადგენთ თქვენ, ქალბატონი წულუკიანი და ბატონი ურთმელიძე".

მოსამართლემ გვარამიას თავის შეკავებისკენ მოუწოდა, რაზეც რუსთავი 2-ის გენერალურმა დირექტორმა უპასუხა, რომ მისი სიტყვები უხამსობას არ შეიცავდა და გამოხატვის თავისუფლებას ვერ წაართმევდნენ:

"არაფერს არ შევიკავებ, ეს არის ჩემი პოზიცია და ამ პოზიციას გამოვხატავ თავისუფლად. ვერ წამართმევთ ჩემი გამოხატვის თავისუფლებას, რომელიც არც უხამსობაა და არც შეურაცხყოფა. ზუსტად ერთნაირად დასრულდება ყველა თქვენთაგანისთვის ეს პროცესი და არამხოლოდ ეს პროცესი".

მოსამართლე გუჯაბიძის წინადადების შემდეგ, ნიკა გვარამიამ განაცხადა, რომ მასაც უკვირდა გუჯაბიძის მონაწილეობა ამ საქმეში, თუმცა ის არ აპირებს მონაწილეობის მიღებას თამაშებში მანტიის გახდაზე, თუმცა მოსამართლე ნატა ნაზღაიძემ მას სიტყვის დასრულების უფლება არ მისცა და გვარამიას დარბაზი დაატოვებინა.

თბილისის სააპელაციო სასამართლოში რუსთავი 2-ის საქმის განხილვის პარალელურად, სასამართლოს ეზოში შეკრებილნი არიან ტელეკომპანიის მხარდამჭერები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.