რუსეთის თავდაცვის სამინისტროს განცხადებით, კონტინენტთაშორისი ბალისტიკური რაკეტა სარმატი გამოსცადეს. მათივე თქმით, ეს რაკეტის პირველი გაშვება იყო. ინფორმაციას სამთავრობო მედია რია ავრცელებს.

კონტინენტთაშორისი რაკეტის წარდგენისას პუტინი დაემუქრა ყველას, ვისაც რუსეთისადმი "აგრესიული რიტორიკა" აქვს და აღნიშნა, რომ მალე მას დანაყოფებს გადასცემენ.

აგრესორი ქვეყნის პრეზიდენტმა განაცხადა, რომ ეს მნიშვნელოვანი მოვლენაა რუსული არმიის შეიარაღების გაზრდისთვის. მისი მტკიცებით, ახალ რაკეტას აქვს უნარი ყველა ანტისარაკეტო სისტემა გადალახოს, მსოფლიოში ანალოგი არ ჰყავს და "დიდი ხანი არც ეყოლება".

"ეს ნამდვილად უნიკალური იარაღი ჩვენი შეიარაღებული ძალების საბრძოლო პოტენციალს გააძლიერებს. უზრუნველყოფს რუსეთის უსაფრთხოებას საგარეო საფრთხისგან და აიძულებს დაფიქრდეს მათ, ვინც ნახევრად გააფთრებული, აგრესიული რიტორიკით ცდილობს, დაემუქროს ჩვენს ქვეყანას", — განაცხადა მან.

იქვე ხაზგასმით თქვა, რომ რაკეტა სრულიად რუსული ნაწილებისგანაა დამზადებული, რაც სამომავლო სერიულ წარმოებას გაამარტივებს.

"დააჩქარებს მის გადემას სტრატეგიული დანიშნულების სარაკეტო დანაყოფებისთვის", — განაცხადა მან.

ამერიკის შეერთებული შტატების ოფიციალური პირების განცხადებით, რაკეტის გაშვების შესახებ ინფორმაცია ჰქონდათ და პროცესს აკვირდებოდნენ. პენტაგონის პრესმდივანმა, ჯონ კირბიმ განაცხადა, რომ ასეთი ტესტირება რუტინულია და გასაკვირი არ ყოფილა. მისივე თქმით, აშშ რუსეთის მიერ რაკეტის გამოცდას საფრთხისშემცველად არ მიიჩნევს.