რუსთავი 2-ის ადვოკატები სააპელაციო სასამართლოს მოსამართლეთა კოლეგიას შუამდგომლობით სთხოვდნენ, გადადებულიყო საქმის განხილვა, რადგან მათ საკმარისი დრო არ ჰქონდათ მოსამზადებლად. აღნიშნული შუამდგომლობა სასამართლომ არ დააკმაყოფილა.

ადვოკატები მოსამართლეს განუმარტავდნენ, რომ გუშინ, 30 მაისს, სასამართლო განხილვა 6 საათზე დამთავრდა და მათ არ ჰქონდათ გონივრული ვადა კლიენტის უფლებების დასაცავად. რუსთავი 2-ის გენერალურმა დირექტორმა ნიკა გვარამიამ თქვა, რომ გუშინდელი დღის მერე მისთვის სრულიად შეუძლებელია სასამართლო პროცესისთვის მომზადების პარალელურად 1 000-კაციანი ორგანიზაციის მართვა და ეს აზიანებს კომპანიის ინტერესებს.

საქმის განხილვა სააპელაციო სასამართლოში ჩვეულებრივ გაგრძელდა. მოსამართლემ ნიკა გვარამიას გაფრთხილება მისცა, გაზეთ ქრონიკა პლუსის რედაქტორი ელისო კილაძე და მსახიობი ია ფარულავა კი, სიცილის გამო, დარბაზიდან გააძევა.