საგარეო საქმეთა სამინისტროს განცხადებით, ოკუპირებული ცხინვალის რეგიონში ე.წ საპრეზიდენტო არჩევნებს გმობენ. მათი თქმით, ეს საქართველოს სუვერენიტეტისა და ტერიტორიული მთლიანობის წინააღმდეგ მიმართულ რუსეთის ფედერაციის მორიგი უკანონო აქტია.

"სრულად ეწინააღმდეგება საერთაშორისო სამართლის ნორმებსა და პრინციპებს. მსგავსი პროვოკაციული ქმედებები მიზნად ისახავს საქართველოს რეგიონების უკანონო ოკუპაციისა და ქართველების მიმართ განხორციელებული ეთნიკური წმენდის ლეგიტიმაციას", — ნათქვამია განცხადებაში.

მათივე თქმით, საქართველოს ორი განუყოფელი რეგიონის უკანონო ოკუპაციის პირობებში ე.წ არჩევნებს ვერანაირი სამართლებრივი ეფექტი ვერ ექნება. ასევე, სამართლებრივი ეფექტი ვერ ექნება ოკუპირებულ ცხინვალში დაანონსებულ ე.წ რეფერენდუმსაც.

"საგარეო საქმეთა სამინისტრო მოუწოდებს რუსეთის ფედერაციას, პატივი სცეს საქართველოს სუვერენიტეტსა და ტერიტორიულ მთლიანობას, შეასრულოს ნაკისრი საერთაშორისო ვალდებულებები, მათ შორის ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმება, და შეცვალოს უკანონო გადაწყვეტილება ოკუპირებული ტერიტორიების ე.წ. დამოუკიდებლობის აღიარების შესახებ.

მივმართავთ საერთაშორისო თანამეგობრობას, სათანადოდ შეაფასოს და ქმედითი რეაგირება მოახდინოს რუსეთის ფედერაციის მხრიდან საქართველოს სუვერენიტეტისა და ტერიტორიული მთლიანობის ხელყოფისაკენ მიმართულ უკანონო ნაბიჯზე", — აღნიშნულია განცხადებაში.

ოკუპირებული ცხინვალის რეგიონის ე.წ საპრეზიდენტო არჩევნებში მიმდინარეობს. მონაწილეობას 5 კანდიდატი იღებს.