ევროკომისიის პრეზიდენტმა, ურსულა ფონ დერ ლაიენმა უკრაინის პრეზიდენტ ვოლოდიმირ ზელენსკის ევროკავშირში წევრობის განაცხადთან დაკავშირებული კითხვარი გადასცა. მისი თქმით, ევროკავშირი უკრაინას მხარს დაუჭერს, რათა ქვეყანამ წევრობის კანდიდატის სტატუსი დაჩქარებულად, რამდენიმე კვირაში მიიღოს

"ამ კონვერტში არის მნიშვნელოვანი ნაბიჯი ევროკავშირის წევრობისკენ. კითხვარი, რომელიც აქ არის, არის ჩვენი განხილვის საფუძველი უახლოეს კვირებში. სწორედ აქედან იწყება თქვენი გზა ევროპისა და ევროკავშირისკენ", — ციტირებს ლაიენს CNN.

როგორც BBC წერს, ლაიენმა ასევე აღნიშნა, რომ რუსეთი ეკონომიკურ, ფინანსურ და ტექნოლოგიური ნგრევისკენ წავა, მაშინ როცა უკრაინა ევროპული მომავლისკენ მიდის.

ფონ დერ ლეიენმა თქვა ისიც, ზელენსკისთან გააგრძელებს მჭიდრო თანამშრომლობას, რათა უკრაინამ კითხვარი რამდენიმე კვირაში შეავსოს. CNN წერს, ზელენსკიმ ლაიენს ხუმრობით უპასუხა: "ჩვენ მზად გვექნება პასუხები, ერთ კვირაში".

"დღეს მივიღეთ კითხვარი ევროკომისიისგან, რომლის პასუხები იქნება საფუძველი ევროკომისიის დასკვნის მომზადებისთვის უკრაინის მზადყოფნის შესახებ ევროკავშირში გაწევრიანების მოლაპარაკებებისთვის", — თქვა ზელენსკიმ.

ევროკომისიის პრეზიდენტი ურსულა ფონ დერ ლაიენი და ევროკავშირის უმაღლესი წარმომადგენელი ჟოზეფ ბორელი დღეს, 8 აპრილს კიევში ჩავიდნენ. ზელენსკისთან შეხვედრამდე ისინი ბუჩაში იმყოფებოდნენ.

უკრაინის პრეზიდენტმა, ვოლოდიმირ ზელენსკიმ ქვეყნის ევროკავშირში გაწევრიანების მოთხოვნას ხელი 28 თებერვალს მოაწერა. პირველ მარტს კი ევროპარლამენტმა მიიღო რეზოლუცია, რომელიც უმკაცრესად გმობს რუსეთის უკანონო შეჭრას უკრაინაში და მხარს უჭერს უკრაინისთვის ევროკავშირის კანდიდატის სტატუსის მინიჭებას.