შინაგან საქმეთა სამინისტრომ აუდიტორია 115-ის ზოგიერთი წევრის მიერ გამოცდების გადასატანად ყალბი დოკუმენტების შესაძლო დამზადებაზე გამოძიება დაიწყო.

შსს-ს პრესსამსახურის ცნობით, გამოძიება სსკ-ის 362-ე მუხლით მიმდინარეობს, დეტალებზე კი უწყებაში არ საუბრობდნენ.

სისხლის სამართლის კოდექსის 362-ე მუხლის ყალბი დოკუმენტის დამზადება, გასაღება ან გამოყენებას გულისხმობს, რაც ჯარიმით, ან სამ წლამდე თავისუფლების აღკვეთით ისჯება. იგივე ქმედება ჩადენილი არაერთგზის ისჯება თავისუფლების შეზღუდვით ვადით სამ წლამდე, ან თავისუფლების აღკვეთით ვადით სამიდან ექვს წლამდე.

აუდიტორია 115-ის წევრების მიერ გამოცდების გადასატანად ყალბი ცნობების შესაძლო დამზადებაზე სტატია გაზეთში კვირის პალიტრა გამოქვეყნდა.

აუდიტორია 115-ში ამბობენ, რომ მათ უჩნდებათ განცდა, თითქოს საგამოძიებო უწყებები ზოგადად ცდილობენ დააშინონ მოძრაობის წევრები. გიორგი არობელიძის თქმით, სტუდენტები მუდმივად იყენებენ გამოცდების ორი-სამი დღით გადატანის პრაქტიკას.

შინაგან საქმეთა სამინისტრო, ასევე, იძიებს აუდიტორია 115-ის წევრების მიერ საზოგადოებრივი მაუწყებლის შენობაში შეჭრის საქმესაც.