საქართველოს საგარეო საქმეთა სამინისტროს განცხადებით, მინისტრმა, ილია დარჩიაშვილმა უკრაინელ კოლეგასთან გაცნობითი ხასიათის შეხვედრა გამართა.

"NATO-ს საგარეო საქმეთა მინისტერიალზე მქონდა შესაძლებლობა ხანმოკლე შეხვედრა გამემართა უკრაინის საგარეო საქმეთა მინისტრთან, დმიტრო კულებასთან. შევთანხმდით, რომ გავაგრძელებთ მჭიდრო კომუნიკაციას. კიდევ ერთხელ დავადასტურე საქართველოს მხარდაჭერა უკრაინის მიმართ", — წერს დარჩიაშვილი Twitter-ზე.

საქართველოს ახალი საგარეო საქმეთა მინისტრი უკრაინელ კოლეგას დღეს პირველად შეხვდა. დარჩიაშვილის მინისტრად დანიშვნის შემდეგ კულებამ განაცხადა, რომ მასთან მუშაობას ელის და საქართველოსგან სრული მხარდაჭერის იმედი გამოთქვა. დარჩიაშვილმა კულებას მადლობა გადაუხადა და თქვა, რომ მათი ნაყოფიერი თანამშრომლობით ორ ქვეყანას შორის მეგობრობა გაძლიერდება.