ხშირია შემთხვევები, როდესაც სესხი უკვე აღებულია, მაგრამ მომხმარებელი მაინც გაურკვევლობაშია, ან სულაც, რამდენიმე თვის შემდეგ აღმოაჩენს მისთვის სრულიად ახალ დეტალებს. თუ გსურს, რომ ასეთ მდგომარეობაში არ აღმოჩნდე, სესხი აღებამდე უნდა დაითვალო.

ამისთვის რამდენიმე ნაბიჯის გადადგმაა საჭირო: მნიშვნელოვანია, რომ მსესხებელი ორგანიზაციისგან ამომწურავი ინფორმაციის მიღება მოითხოვო. ამასთან, სასესხო ხელშეკრულება გულმოდგინედ უნდა წაიკითხო. კიდევ ერთი ხერხი, რომლის საშუალებითაც სამომავლოდ ასაღები, ან უკვე აღებული სესხის დათვლა შეგიძლია, საკუთარი კალკულატორია. აქ ჩვეულებრივი კალკულატორი კი არა, ეროვნული ბანკის ეფექტური საპროცენტო განაკვეთის გამომთვლელი კალკულატორი იგულისხმება — ის დაახლოებით იმ სასწორს მოგაგონებს, რომელიც ბაზარში სიარულისას დაგვაქვს.

რატომ გვჭირდება ეფექტური საპროცენტო განაკვეთის დათვლა

ფოტო: dreamstime

სესხის აღებამდე ეფექტური საპროცენტო განაკვეთის დათვლა ძალიან მნიშვნელოვანია. ის სრულად აჩვენებს იმ ხარჯების მოცულობას, რომლის გადახდაც სესხის აღების სანაცვლოდ მოგიწევს. იმისათვის, რომ ზუსტად გაიგო, რატომ გჭირდება ეფექტური განაკვეთის გამოთვლა, მასსა და ნომინალურ საპროცენტო განაკვეთს შორის განსხვავებას უნდა მიაქციო ყურადღება.

ეფექტური საპროცენტო განაკვეთი სესხის ღირებულებას პროცენტებში გამოხატავს. მისი გაანგარიშებისას კრედიტის მომსახურების პერიოდში შენ მიერ გასაწევი ყველა ხარჯია გათვალისწინებული. ამასთან, აქ ჩანს ხარჯების გაწევის პერიოდიც, ანუ დროც. ის ნომინალურ საპროცენტო განაკვეთსაც აერთიანებს და იმ გადასახდელებსა და საკომისიოებსაც, რომელთა გადახდაც სესხის აღებიდან მის დაფარვამდე გიწევს.

მარტივად რომ ვთქვათ, ნომინალური საპროცენტო განაკვეთი სესხის ძირის პროცენტს მოიცავს, ხოლო რეალურში — დამატებითი ხარჯებიც შედის.

როგორ გამოვიყენოთ კალკულატორი

ფოტო: iStock

ეფექტური საპროცენტო განაკვეთის გამოთვლელი კალკულატორი რამდენიმე ველის შევსების შემთხვევაში ზუსტად დაგითვლის იმ განაკვეთსა და თანხის ოდენობას, რისი გადახდაც მოგიწევს რეალურად.

კალკულატორი შემდეგ ველებს მოიცავს:

  • სესხის თანხა;
  • საშეღავათო პერიოდი;
  • სესხის ვალუტა;
  • სესხის ვადა;
  • წლიური ნომინალური საპროცენტო განაკვეთი;
  • გაცემის თარიღი და გადახდის რიცხვი.

ამ და კიდევ რამდენიმე კრიტერიუმის შევსების შემთხვევაში ზუსტად გეცოდინება, რამდენი იქნება დამატებითი ხარჯი შენი სესხისთვის, რაც კრედიტის აღების გადაწყვეტილების მიღებაში ძალიან დაგეხმარება.

სესხის ეფექტური საპროცენტო განაკვეთის დასათვლელად ესტუმრეთ ამ ბმულს.