პარლამენტის თავმჯდომარე შალვა პაპუაშვილი, უკრაინის ელჩის საქართველოდან გაწვევის გადაწყვეტილებას არასამართლიანად მიიჩნევს, თუმცა, დასძენს, რომ ახლა შეფასებების დრო არ არის.

"თავის დროზე კონსულტაციებზე გაწვევა, ახლა მოხსნა ელჩის, მე თავის დროზეც ვთქვი, ეს ჩვენ არ მიგვაჩნდა სამართლიან გადაწყვეტილებად, არ არის ეს მთლად ახსნადი ჩვენთვის. თუმცა, მეორე მხრივ, ჩვენ ვამბობთ, რომ ეს არ არის ის პერიოდი, როდესაც ჩვენ უნდა ვისაუბროთ ამ შეფასებებზე, დღეს ჩვენ სრულად სოლიდარული ვართ უკრაინელი ხალხის მიმართ და მთავარია, ვკონცენტრირდეთ ამ მთავარზე, რომ დასრულდეს ომი უკრაინაში", — განაცხადა მან.

უკრაინულმა მედიამ დაწერა, რომ ვოლოდიმირ ზელენსკიმ საქართველოდან და მაროკოდან ელჩები გაიწვია. როგორც ზელენსკი განმარტავს, არიან ადამიანები, რომლებიც ყველასთან მუშაობენ სახელმწიფოს დასაცავად და არიან ისეთებიც, რომლებიც მხოლოდ "თანამდებობაზე დარჩენისთვის" მუშაობენ. სწორედ ამ დროს პრეზიდენტმა თქვა, რომ ხელი მოაწერა ასეთი ადამიანის გაწვევას და მაროკოს ელჩი დაასახელა, იქვე კი აღნიშნა, რომ უკრაინის ელჩი საქართველოდან სამშობლოში დაბრუნებულია. ეს დაბნეულობას იწვევს, რადგან ზელენსკიმ კონსულტაციებისთვის ელჩი ერთი თვის წინ გაიწვია, თუმცა ამ დრომდე იგორ დოლგოვი საქართველოში იმყოფებოდა.