უკრაინის პრეზიდენტის, ვოლოდიმირ ზელენსკის განცხადებით, დონბასში ახალი დარტყმებისთვის რუსული ჯარების მატება ხდება, რისთვისაც ემზადებიან. ახალ ვიდეოში მან ასევე ისაუბრა, რომ კიევიდან და ჩერნიგოვიდან რუსული ჯარების აქტივობის შემცირება რეალურად არა გაყვანის, არამედ მათი გაძევების შედეგია.

"დიახ, არის მიმდინარე მოლაპარაკების პროცესი. მაგრამ ჯერ მხოლოდ სიტყვებია. ჯერჯერობით დაკონკრეტების გარეშე. ასევე არის სხვა სიტყვებიც — თითქოსდა, კიევიდან და ჩერნიგოვიდან რუსული ჯარების გაყვანაზე, თითქოს, ამ მიმართულებით ოკუპანტების აქტივობის შემცირების შესახებ.

ჩვენ ვიცით, რომ ეს არა გაყვანა, არამედ განდევნის შედეგია, ჩვენი დამცველების მუშაობის შედეგი. მაგრამ ჩვენ ასევე ვხედავთ, რომ ამავე დროს ხდება რუსული ჯარების მატება დონბასში ახალი დარტყმებისთვის. და ჩვენ ვემზადებით ამისთვის", — თქვა მან.

მისივე თქმით, უკრაინის ამჟამინდელ ვითარებაში არ უნდა იყოს ისეთი დისკუსია, რომელსაც პოლიტიკოსები და საზოგადოება მშვიდობიან პერიოდში არიან მიჩვეულები.

"თუ ვინმე თავს აჩვენებს, რომ შეუძლია ჩვენს შეიარაღებულ ძალებს ასწავლოს როგორ იბრძოლონ, როგორ გაუწიონ წინააღმდეგობა მტერს, ამის საუკეთესო გზაა პირდაპირ ბრძოლის ველზე წასვლა.

არა სახლში სკამიდან ან იმ ადგილიდან, სადაც უსაფრთხოებისთვის წახვედით, ნამდვილი საბრძოლო შეტაკებებიდან. თუ ამისთვის მზად არ ხართ, არ უნდა დაიწყოთ ჩვენი დამცველებისთვის [ჭკუის] სწავლება", — აღნიშნა უკრაინის პრეზიდენტმა.

სტამბულში რუსეთ-უკრაინის მოლაპარაკებების დასრულების შემდეგ რუსულმა მხარემ განაცხადა, რომ სიტუაციის დეესკალაციისთვის 2 მნიშვნელოვან ნაბიჯს გადადგამს. მათი თქმით, ისინი შეამცირებენ საბრძოლო აქტივობას კიევისა და ჩერნიგოვის მიმართულებით.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში