პარლამენტის თავმჯდომარის, შალვა პაპუაშვილის განცხადებით, ბრიუსელში ვიზიტის დროს მიიღო დასტური, რომ ევროკავშირის ევროკავშირის წევრობის კანდიდატის სტატუსის მისაღებად ბიუროკრატიული პროცედურები მაქსიმალურად დაჩქარდება. ამის შესახებ მან ჟურნალისტებს განუცხადა.

"სასიხარულო არის ის, რომ ევროკავშირი, რაზეც ჩვენ ნამდვილად მივიღეთ დასტური, ცდილობს, რომ ბიუროკრატიული პროცედურები რაც არის, მაქსიმალურად დაჩქარდეს და ჩვენი განაცხადი უკვე გადაგზავნილი იქნა შესაბამის დეპარტამენტებში, რომლებმაც ახლა უნდა შეიმუშავონ კითხვარი კონკრეტულ ქვეყნებთან დაკავშირებით და სავარაუდოდ, ეს მალე მოხდება.

სხვა დროს თუ პროცედურები გრძელდებოდა თვეები, სავარაუდოდ, ეს რამდენიმე კვირაში დასრულდება და გამოიგზავნება კითხვარი, რომელიც წარმოადგენს საფუძველს ქვეყნის შესწავლისა და ანალიზისა", — თქვა მან.

უკრაინის პრეზიდენტმა, ვოლოდიმირ ზელენსკიმ ქვეყნის ევროკავშირში გაწევრიანების მოთხოვნას ხელი 28 თებერვალს მოაწერა. პირველ მარტს კი ევროპარლამენტმა მიიღო რეზოლუცია, რომელიც უმკაცრესად გმობს რუსეთის უკანონო შეჭრას უკრაინაში და მხარს უჭერს უკრაინისთვის ევროკავშირის კანდიდატის სტატუსის მინიჭებას.

ამის შემდეგ, 2 მარტს ქართული ოცნების თავმჯდომარემ, ირაკლი კობახიძემ განაცხადა, რომ საქართველო ევროკავშირის წევრობის კანდიდატის სტატუსის მისაღებად განაცხადს ხელს მოაწერდა, რაც 3 მარტს პრემიერმინისტრმა გააკეთა.