ბათუმის 11-12 მარტის არეულობის ორგანიზების ბრალდებით დაკავებულებს, თავისუფალი ზონის ყოფილ წევრს, ირაკლი ჩხვირკიასა და არასამთავრობო ორგანიზაცია კორუფციასთან ბრძოლის საინფორმაციო ცენტრის ხელმძღვანელს, მერაბ ღოღობერიძეს, ბათუმის საქალაქო სასამართლომ რამდენიმე წუთის წინ წინასწარი პატიმრობა შეუფარდა.

მოსამართლე ვიოლეტა ფორჩხიძემ დააკმაყოფილა ბრალდების მხარის, პროკკურატურის მოთხოვნა. დაკავებულების ადვოკატებს სასამართლოს გადაწყვეტილების გასაჩივრება მომავალი 48 საათის განმავლობაში შეეძლებათ.

დაკავებულების მომავალი სასამართლო პროცესი ბათუმის საქალაქო სასამართლოში 20 ივლისს გაიმართება.

ჩხირკვიას დაცვის მხარე ბათუმის აქციისა და არეულობის ორგანიზატორობის ბრალდებას უარყოფს და აცხადებს, რომ ის ბათუმში იმ დროს ჩავიდა, როდესაც არეულობა უკვე დასრულებული იყო.

ჩხირკვიასა და ღოღობერიძეს ბრალი წაყენებული აქვთ სისხლის სამართლის კოდექსის 225-ე მუხლის პირველი ნაწილით, რაც გულისხმობს მასობრივი არეულობის ორგანიზებას ან ხელმძღვანელობას, რასაც თან ახლავს ძალადობა, რბევა, ცეცხლის წაკიდება, იარაღის ან ასაფეთქებელი მოწყობილობის გამოყენება ანდა ხელისუფლების წარმომადგენლისადმი შეიარაღებული წინააღმდეგობა. დამტკიცების შემთხვევაში, დანაშაული ისჯება თავისუფლების აღკვეთით ვადით ექვსიდან ცხრა წლამდე.

2017 წლის 11 მარტს, ბათუმში, პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

არეულობამდე გარკვეული პერიოდით ადრე, პოლიციელებმა მერაბ ღოღობერიძე ჯერ დააჯარიმეს, შემდეგ კი პოლიციისთვის დაუმორჩილებლობის მოტივით დააკავეს, მოგვიანებით კი გაათავისუფლეს. აღნიშნული ფაქტის გამო, მერაბ ღოღობერიძემ საპატრულო პოლიციის აჭარის მთავარ სამმართველოსთან საპროტესტო აქცია გამართა პოლიციის უფროსის, კახა ბუხრაძის გადადგომის მოთხოვნით.

რაც შეეხება ირაკლი ჩხვირკიას, მაშინ, როცა ბათუმში არეულობამ პიკს მიაღია, ის მივიდა მოვლენების მიმდინარეობის ადგილას და მოითხოვა საპატრულო პოლიციის უფროსის გადადგომა. ის ასევე, არეულობაში მონაწილეების სახელით ითხოვდა შს მინისტრთან შეხვედრასა და მისგან აღნიშნული პირებისთვის ხელშეუხებლობის გარანტიის მიღებას. მან ხელისუფლებას 1,5 საათი მისცა და პირობა დადო, რომ ამ დროის განმავლობაში ქვების სროლა არ გაგრძელდება:

"მე მინდა ამ ბიჭების სახელით ვთქვა, რომ არ იქნება ქვების სროლა, არ იქნება ცეცხლის დანთება და არაფერი. ვიდგებით მშვიდობიანად, მოწესრიგებულად, ისე, როგორც აჭარელ და ქართველ ხალხს შეეფერება".

როგორც ირაკლი ჩხვირკიამ მაშინ თქვა, ის თბილისიდან სპეციალურად ჩავიდა ბათუმში, რათა ამ ხალხს "გვერდით დადგომოდა."

მოგვიანებით, ირაკლი ჩხვირკიამ უარყო რაიმე კავშირი არეულობის ორგანიზებასთან, თუმცა ერთიანმა ნაციონალურმა მოძრაობამ ის პარტიიდან გარიცხა.

ირაკლი ჩხვირკია და მერაბ ღოღობერიძე შსს-მ 24 აპრილს დააკავა.