ოსკაროსანი მსახიობი შონ პენი უკრაინაში რუსეთის შეჭრაზე დოკუმენტურ ფილმს იღებს.

შონ პენი 2021 წლის ნოემბრიდან ემზადება დოკუმენტური ფილმის გადასაღებად, როცა რუსეთმა უკრაინის საზღვრებთან სამხედრო ძალები განათავსა. 24 თებერვალს კი, როცა პუტინმა უკრაინაში შეჭრის ბრძანება გასცა, მსახიობი და რეჟისორი კიევში დარჩა და მოვლენების ეპიცენტრში ადევნებს თვალს საომარ ვითარებას.

შონ პენი ესწრება ოფიციალურ ბრიფინგებს, ესაუბრება სამხედრო პირებს და რიგით მოქალაქეებს მიმდინარე მოვლენებზე.

ცნობილია, რომ ის მხარს უჭერს უკრაინის სუვერენიტეტს და მისი დოკუმენტური ფილმის მიზანი პუტინის აგრესიული და იმპერიალისტური პოლიტიკის ჩვენებაა.

აღსანიშნავია, რომ ჰოლივუდის ცნობილი მსახიობი პირისპირ შეხვდა უკრაინის პრეზიდენტსაც, რისი ამსახველი კადრებიც ვოლოდიმირ ზელენსკიმ ინსტაგრამის ოფიციალური გვერდის ე.წ. Story-ში გამოაქვეყნა.

ფოტო: instagram / screenshot

უკრაინის ხელისუფლებამ მადლიერება გამოხატა შონ პენის მიმართ, რადგან მსახიობი და რეჟისორი პირადად ჩავიდა კიევში, "რათა აღბეჭდოს უკრაინაში მიმდინარე მოვლენები და მსოფლიოს მოუყვეს ჩვენს ქვეყანაში რუსეთის შეჭრის შესახებ".

განცხადებაში ასევე ვკითხულობთ:

"შონ პენი მათ შორისაა, ვინც უკრაინას მხარს უკრაინაში ყოფნით უჭერს. ჩვენი ქვეყანა მადლიერია, რომ მსგავსი სიმამაცე და გამბედაობა გამოიჩინა, რაც სხვა ბევრს აკლია, განსაკუთრებით დასავლელ პოლიტიკოსებს".