კანზასელმა კაცმა 20 წელზე მეტი ციხეში იმ ორმაგი მკვლელობისთვის გაატარა, რომელიც არ ჩაუდენია და ამბობს, რომ ამ უსამართლობის ერთ-ერთი მონაწილე ყოფილი დეტექტივია, რომელმაც ეს საქმე მის საწინააღმდეგოდ განზრახ წარმართა.

45 წლის ლამონტე მაკინტაირი და დედამისი 2018 წელს შეტანილ სარჩელში ამტკიცებენ, რომ მთავრობა პასუხისმგებელია პოლიციის ყოფილი დეტექტივის, როჯერ გოლუბსკის და იმ სხვა ოფიცრების ქმედებებზე, რომლებიც მაკინტაირის დევნაში იღებდნენ მონაწილეობას.

ლამონტეს დედა ასევე 30 მილიონ დოლარს ითხოვს, რადგან დეტექტივი გოლუბსკი მას სექსუალურად ავიწროებდა და როცა მასთან სექსზე უარი თქვა, დეტექტივმა დასასჯელად მის შვილს მკვლელობა დააბრალა.

დედა-შვილი ამტკიცებს იმასაც, რომ როჯერ გოლუბსკი შავკანიან ქალებზე წლების განმავლობაში ძალადობდა, რაც სხვა ოფიცრებმაც იცოდნენ, მაგრამ რეაგირება არ ჰქონდათ.

ყოფილი დეტექტივი ბრალდებებს უარყოფს და ამტკიცებს, რომ თავისი კარიერის განმავლობაში — 1975 წლიდან 2010 წლამდე — კარგი ოფიცერი იყო.

ლამონტე 1996 წელს დააკავეს და ციხიდან 2017 წელს გაათავისუფლეს. პროკურორმა სასამართლოს მისი გათავისუფლება და ყველა ბრალდების მოხსნა სთხოვა. 2020 წელს მას უდანაშაულობის სერტიფიკატი მიენიჭა და სახელმწიფოსგან 1,5 მილიონი დოლარიც გადაეცა.

როგორც სარჩელშია აღნიშნული, ყოფილი პატიმარი და დედამისი პოსტტრავმული სტრესული აშლილობით იტანჯებიან: დედა 17 წლის განმავლობაში ითხოვდა ფსიქოლოგიურ დახმარებას, ნათქვამია სარჩელში.

კანზასის მთავრობა ამტკიცებს, რომ იმ შემთხვევაშიც კი, თუ ბრალდებები დადასტურდება, ის არ არის პასუხისმგებელი, რადგან ოფიცრების ქმედებები სამსახურის გარეთ ხორციელდებოდა. მთავრობა უარყოფს იმასაც, რომ პოლიციის უფროსმა იცოდა სავარაუდო დანაშაულის შესახებ.