რუსეთის ფედერაციის საბჭოს თავმჯდომარემ, ვალენტინა მატვიენკომ, რუსეთის მოსახლეობას მოუწოდა, რომ პანიკას არ აჰყვნენ და წიწიბურას და შაქრის საჭიროზე მეტი ოდენობა არ შეიძინონ. ამავდროულად ადგილობრივი გამოცემები იუწყებიან, რომ რუსეთში პრეზერვატივებზე მოთხოვნაც მკვეთრად გაიზარდა.

როგორც რუსული სააგენტო TASS წერს, ვალენტინა მატვიენკომ განაცხადა, რომ ქვეყანას შაქრისა და წიწიბურას საკმარისი მარაგი აქვს და მოსახლეობისთვის მათი წინასწარ შეძენის საჭიროება არ დგას. პანიკური მომარაგება კი ხელოვნურ დეფიციტს შექმნის და ფასებს გაზრდის.

ასევე რუსული გამოცემა RBK-ს ინფორმაციით, ბოლო კვირებში განსაკუთრებით გაიზარდა მოთხოვნა პრეზერვატივებზე: 28 თებერვლიდან 6 მარტამდე, 2021 წლის იმავე პერიოდთან შედარებით, რუსეთში პრეზერვატივების გაყიდვები 17%-ითაა გაზრდილი. რუსეთის ერთ-ერთი უმსხვილესი საცალო ვაჭრობის მენეჯერის არაოფიციალური ინფორმაცით კი, მათ ქსელებში მარტის პირველ ორ კვირაში პრეზერვატივებზე მოთხოვნა 30%-ით გაიზარდა.

უკრაინული Pravda-ს თანახმად, რუსეთისთვის დაკისრებული მასშტაბური სანქციების გამო, ადგილობრივები შიშობენ, რომ მომავალში გარკვეულ პროდუქტებზე დეფიციტი შეიქმნება და ფასები მნიშვნელოვნად გაიზრდება. საცალო მოვაჭრეები ადასტურებენ, რომ აპრილიდან ფასების მკვეთრი ცვლილებისთვის ემზადებიან.

თუმცა რუსეთის ფედერაციის მრეწველობისა და ვაჭრობის მინისტრის განცხადებით, ქვეყანაში პრეზერვატივების დეფიციტი არ შეიქმნება, რადგან მათთან მთავარ მწარმოებლებს პროდუქტის მიწოდება არ შეუწყვეტიათ.