სპეციალური საგამოძიებო სამსახურის განცხადებით, ფორმულას თანამშრომლებისთვის საქმიანობისთვის ხელის შეშლის ფაქტზე ერთი პირი დააკავეს. მათი თქმით, ჟურნალისტებისა და ოპერატორების საქმიანობაზე ბრალდებულმა უკმაყოფილება გამოთქვა, სიტყვიერი და ფიზიკური შეურაცხყოფა მიაყენა და არ მისცა ინტერვიუს ჩაწერის შესაძლებლობა.

მათივე ცნობით, ცხელ ხაზზე შემოსული შეტყობინების შემდეგ გამოძიება სისხლის სამართლის კოდექსის 154-ე მუხლის მეორე ნაწილით დაიწყო. ჩატარდა გადაუდებელი საგამოძიებო პროცედურები, დაიკითხნენ ჟურნალისტები და ოპერატორები, დათვალიერდა შემთხვევის ადგილი და ვიდეო ჩანაწერი. ამასთან, დაინიშნა სასამართლო და სამედიცინო ექსპერტიზები.

"უმოკლეს დროში მოპოვებული მტკიცებულებების საფუძველზე, ჩვენს მიერ გატარებული ოპერატიული და საგამოძიებო მოქმედებების შედეგად, ბრალდებულის სახით დაკავებულ იქნა ჟურნალისტის პროფესიულ საქმიანობაში უკანონოდ ხელის შეშლის ფაქტზე მხილებული მოქალაქე", — ნათქვამია განცხადებაში.

გარდა ამისა, უწყების ცნობით, მთავარი არხის თანამშრომლების მიმართ ჩადენილ დანაშაულსაც იძიებენ. სამსახურში ამბობენ, რომ აღნიშნულზე გამოძიება აქტიურ რეჟიმში მიმდინარეობს.

ფორმულას გადამღებ ჯგუფს გუშინ, 17 მარტს აბაშიძის ქუჩაზე ერთ-ერთ ბარში დაესხნენ. ამავე დღეს მთავარი არხის ჟურნალისტმა განაცხადა, რომ ზუგდიდში ალტ-ინფოს ოფისში ტელეკომპანიის გადამღებ ჯგუფს 15 ადამიანი დაესხა თავს.