უკრაინის პრეზიდენტის ადმინისტრაციის ხელმძღვანელი და მრჩეველი, მიხაილო პოდოლიაკი რუსეთის ფედერაციის წარმომადგენლებისგან ნეიტრალიტეტზე გაკეთებული განცხადებების შემდეგ განმარტავს, თუ რა პოზიციებს აფიქსირებს უკრაინის დელეგაცია მოლაპარაკებებზე. მისი თქმით, ვინაიდან უკრაინა ახლა რუსეთთან პირდაპირ ომშია, ნეიტრალიტეტის მოდელი შეიძლება მხოლოდ იყოს უკრაინული.

"ჩვენ, რა თქმა უნდა, გვესმის ჩვენი პარტნიროების მცდელობების, რომ დარჩნენ ინიციატივების წარმომადგენელ მხარედ მოლაპარაკებების პროცესში. აქედან მოდის სიტყვები ნეიტრალიტეტის ავსტრიულ და შვედურ მოდელებზე, თუმცა ახლა უკრაინა რუსეთის ფედერაციასთან პირდაპირ ომშია, ამიტომ მოდელი შეიძლება იყოს მხოლოდ უკრაინული და მხოლოდ იურიდიულად დამოწმებული უსაფრთხოების გარანტიებით, სხვა არცერთი მოდელი ან ვარიანტი", — ამბობს პოდოლიაკი.

მისი თქმით, უპირველეს ყოვლისა, უკრაინას სჭირდება უსაფრთხოების აბსოლუტური გარანტიები, თუმცა ეფექტური და არა პროტოკოლური ან ბუდაპეშტის მსგავსი. პოდოლიაკის განცხადებით, ეს ნიშნავს იმას, რომ უსაფრთხოების გარანტიებზე ხელმომწერები უკრაინაზე თავდასხმის შემთხვევაში ისე არ იდგებიან განზე, როგორც დღეს.

"ეს ნიშნავს, რომ ისინი კონფლიქტში უკრაინის მხარეს აქტიურ მონაწილეობას მიიღებენ და საჭირო მოცულობის იარაღის დაუყოვნებლივ მოწოდებას ოფიციალურად უზრუნველყოფენ.

ამას გარდა, უკრაინას აღარ სურს ბიუროკრატიულ პროცედურებზე იყოს დამოკიდებული, რომელიც დაუშვებს ან არ დაუშვებს ცის დახურვას. ჩვენ პირდაპირი და მტკიცე გარანტიები გვჭირდება, რომ ცა აუცილებლად დაიხურება", — აცხადებს ის.

მისი თქმით, უკრაინა არასდროს ყოფილა სამხედო სახელმწიფო, რომელიც მეზობლებზე თავდასხმას გეგმავს ამ მეზობლებისგან განსხვავებით, სწორედ ამიტომ დღეს უკრაინას სურს, რომ ჰყავდეს მოკავშირეების ძლიერი ჯგუფი მკაფიოდ განსაზღვრული უსაფრთხოების გარანტიებით.

რუსეთის საგარეო საქმეთა მინისტრმა, სერგეი ლავროვმა დღეს განაცხადა, რომ უსაფრთხოების გარანტიების შესახებ მოთხოვნებთან ერთად მოლაპარაკებებზე უკრაინის ნეიტრალური სტატუსი სერიოზულად განიხილება. მისი თქმით, არსებობს კონკრეტული ფორმულირებები, რომლებიც შეთანხმებასთან ახლოსაა.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში