პოლონეთის პრემიერმინისტრის განცხადებით, ვიცე-პრემიერთან, ასევე, ჩეხ და სლოვენიელ კოლეგებთან ერთად კიევში მიდის. ქვეყანაში მიმდინარე საომარი მოქმედებების ფონზე მათეუშ მორავიეცკი განმარტავს, რომ მათ უკრაინელებისადმი სოლიდარობის გამოხატვა სურთ.

მედიაში გავრცელებული ინფორმაციით, ისინი მატარებლით მიდიან და უკვე გადაკვეთეს უკრაინა-პოლონეთის საზღვარი.

"დღეს, უკრაინის წინააღმდეგ პუტინის კრიმინალური აგრესიის მე-20 დღეს, ვიცე-პრემიერ იაროსლავ კაჩინსკისთან, ჩეხეთის რესპუბლიკის პრემიერმინისტრთან პეტრ ფიალასთან და სლოვენიის პრემიერმინისტრთან იანეს იანშასთან ერთად მივდივართ კიევში, რათა უკრაინელებისადმი ჩვენი სოლიდარობა გამოვხატოთ", — წერს მორავიეცკი.

მან პოლონეთის ყოფილი პრეზიდენტის სიტყვები გაიხსენა, რომელიც ლეხ კაჩინსკიმ საქართველოში 2008 წელს, ომის მიმდინარეობისას თქვა: "დღეს საქართველო, ხვალ უკრაინა, ზეგ ბალტიისპირეთის ქვეყნები და მერე შეიძლება ჩემი ქვეყნის, პოლონეთის დრო დადგეს".

მორავიეცკის თქმით, კაჩინსკის ამ სიტყვებმა მაშინ ომის აღქმა შეცვალა და ქართველებს დამატებითი გამბედაობა შესძინა. მისივე თქმით, მათი მოვალეობაა, ასეთ დროს იყვნენ იქ, სადაც ისტორია იქმნება.

როგორც მორავიეცკი აცხადებს, კიევში წასვლის საკითხი შეთანხმებულია ევროკავშირთან და მის ყველაზე მნიშვნელოვან წარმომადგენლებთან, შარლ მიშელთან და ურსულა ფონ დერ ლაიენთან.