ტყვედ ჩავარდნილი რუსი მფრინავი აღიარებს, რომ მშვიდობიან ხალხს გააზრებულად ბომბავდა. ის ბოდიშს უხდის უკრაინელ ხალხს ყველა უბედურებისთვის, რაც მათმა შეჭრამ გამოიწვია.

"2022 წლის 6 მარტს ვასრულებდი მესამე საბრძოლო ფრენას. ბორტზე იყო 4 ტონა ასაფეთქებელი ბომბი. ბრძანებისა და კოორდინატების მიღების შემდეგ, საბრძოლო დავალების შესრულებისას მივხვდი, რომ სამიზნე იყო არა მოწინააღმდეგის სამხედრო ობიექტები, არამედ საცხოვრებელი კორპუსები და მშვიდობიანი მოსახლეობა, მაგრამ დანაშაულებრივი ბრძანება შევასრულე", — აცხადებს ის.

ტყვე მოუწოდებს რუს სამხედროებს, დაუყოვნებლივ შეწყვიტონ "დანაშაულებრივი ბრძანების შესრულება" და მშვიდობიანი ქალაქების დაბომბვა. მისივე თქმით, ყველაფერს გააკეთებს, რომ ეს ომი მალე დასრულდეს და უკრაინელი ხალხის გენოციდში დამნაშავეებმა პასუხი აგონ.

"მე ვფიქრობ, რომ ეს ომი ჩვენ უკვე წავაგეთ", — ამბობს ის.

უკრაინსკაია პრავდა წერს, რომ ტყვე პოდკოლკოვნიკია, რომელმაც 24 თებერვალს და 3 მარს ჩამოაგდო 12 საჰაერო ბომბი (დღეში 6) ხარკოვის ოლქში, ქალაქ იზიუმში, სამოქალაქო სტრუქტურებზე, იმ მხარეში, სადაც არ არის უკრაინის შეიარაღებული ძალების ქვედანაყოფები. მათივე ინფორმაციით, 6 მარტს ამავე პირმა, ბორტ ნავიგატორთან ერთად, ჩამოაგდო 8 ბომბი ქალაქ ხარკოვში, ასევე სამოქალაქო სტრუქტურებზე.

გავრცელდა იმავე ოთახში გადაღებული კიდევ ერთი რუსი მფრინავი ტყვის ვიდეო, რომელიც ასევე ბოდიშს უხდის უკრაინელ ხალხს და ნანობს, რომ "მათ ტერიტორიაზე" აღმოჩნდა.

"ძალიან ვნანობ, რომ ვასრულებდი ამ დანაშაულებრივ ბრძანებებს. მივმართავ რუსეთის ფედერაციის ჯარისკაცებს, მინდა მოვუწოდო, გამოფხიზლდნენ, დროულად გაჩერდნენ. უკვე ჩამოაგდეს ათეულობით თვითმფრინავი, ასი ათასობით ოჯახი დაინგრა, როგორც უკრაინის, ასევე რუსეთის ტერიტორიაზე, ამიტომ ვთხოვ, შეჩერდნენ", — ამბობს ის.

უკრაინული სამხედრო ძალები ხშირად ავრცელებენ რუსი ტყვეების ვიდეოებს. უმეტეს შემთხვევაში ტყვეები ამბობენ, რომ არ იცოდნენ თუ ომში მიდიოდნენ და ისინი წვრთნებზე გამოიძახეს. ვრცელდება ისეთი ვიდეოებიც, რომლებშიც უკრაინელი ჯარისკაცები ტყვეებს დედებთან არეკინებენ და მოუწოდებენ, რუსეთში უკრაინაში მიმდინარე მოვლენებზე სიმართლე გაავრცელონ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში