ქართული ოცნების დამფუძნებლის, ბიძინა ივანიშვილისთვის სანქციების დაწესების მოთხოვნით პეტიცია შეიქმნა. პეტიციის ავტორები მოთხოვნით ამერიკის შეერთებული შტატების სახელმწიფო დეპარტამენტსა და ევროპარლამენტარებს მიმართავენ. მას ხელს ამდროისთვის 2 276 ადამიანი აწერს.

პეტიციის თანახმა, საქართველოს მოსახლეობის აბსოლუტური უმრავლესობა შეშფოთებულია იმით, რომ მთავრობა პუტინის დღის წესრიგს უჭერს მხარს. მათი თქმით, უკრაინის მხარდაჭერის ნაცვლად, "საქართველოს ღიად პრორუსულმა მთავრობამ ღიად გადადგა ნაბიჯები პუტინის რეჟიმის მხარდასაჭერად". პეტიციის ავოტორები ასახელებენ რამდენიმე მიზეზს, როს გამოც მათი აზრით, სანქციები უნდა დაწესდეს:

  • არ შეუერთდა რუსეთის მიმართ დაწესებულ საერთაშორისო სანქციებს;
  • არ ჩაუკეტა ცა რუსეთის თვითმფრინავებს;
  • უკრაინელი ლტოლვილების დახმარება მან მთლიანად სამოქალაქო სექტორს და მოხალისეებს გადააბარა და ჯერჯერობით ამ კუთხით არანაირი გეგმა არა აქვს;
  • არ შემოუშვა უკრაინული თვითმფრინავი, რომელსაც ქართველი მოხალისეები უკრაინაში უნდა გადაეყვანა;
  • არ პასუხობს ქართველი მოქალაქეების ხმამაღალ მოთხოვნას, გააუქმოს ცალმხრივი უვიზო რეჟიმი რუსეთსა და საქართველოს შორის და იმოქმედოს სახელმწიფო უსაფრთხოების ინტერესებიდან გამომდინარე; [ მთავრობა უფრო შორს წავიდა და განაცხადა, რომ ის მოქალაქეები, ვინც რუსეთიდან ადამიანების მასობრივი შემოდინების წინააღდეგია, შოვინისტია და ეთნიკური ნიშნით დისკრიმინაციას ეწევა. ის დაემუქრა მოქალაქეებს მოქმედი კანონის გამკაცრებით.]
  • აგრძელებს პოლიტიკურ შურისძიებას საქართველოს მესამე პრეზიდენტზე, უკრაინის მოქალაქეზე, ზელენსკის რეფორმების ეროვნული საბჭოს თავმჯდომარეზე, მიხეილ სააკაშვილზე. პუტინის პირადი პოლიტიკური პატიმარი არის არაადამიანური და ღირსებისშემლახველი მოპყრობის მსხვერპლი.

პეტიციაში საუბარია, რომ ხელისუფლებამ დაუშვა ქვეყანაში "მასობრივად შემოსულიყვნენ" რუსეთის მოქალაქეები, ხოლო დამოუკიდებელი მედიის დოჟდის ჟურნალისტი არ შემოუშვეს.

როგორც პეტიციაშია ნათქვამი, ამჟამად საქართველო არის პუტინის პლაცდარმი სანქციებისგან თავის ასარიდებლად და ფულის გასათეთრებლად.

"ჩვენ გვსურს შევცვალოთ საქართველოს ავტოკრატიისკენ მიმავალი გზა, ჩვენ მოვუწოდებთ ამერიკის შეერთებული შტატების სახელმწიფო დეპარტამენტს და ევროპარლამენტარებს, დაუწესონ სანქციები საქართველოს არაფორმალურ მმართველს, ოლიგარქ ივანიშვილს, რომელიც სრულად აკონტროლებს მთავრობის სამივე შტოს, ასევე მის თანამონაწილეებს, მათ შორის და არა მხოლოდ პრემიერ მინისტრს ღარიბაშვილს", — ვკითხულობთ პეტიციაში.