სოფლის მეურნეობის მინისტრი, ოთარ შამუგია ამბობს, რომ სურსათისა და პირველადი მოხმარების პროდუქციის მარაგების კუთხით არანაირი დეფიციტი არაა. ამის შესახებ მან მსხვილი სავაჭრო ქსელების და სურსათისა და პირველადი მოხმარების პროდუქციის იმპორტიორი კომპანიების წარმომადგენლებთან შეხვედრის შემდეგ განაცხადა.

შამუგია თქმით, იმისთვის, რომ "არ მოხდეს ფასების უსაფუძვლო ზრდა", ბაზარზე პროდუქციის სტაბილური მიწოდების შენარჩუნების პარალელურად კომპანიებმა სოციალური პასუხისმგებლობით უნდა იმოქმედონ.

"დღეს არსებულ ვითარებაში, მნიშვნელოვანია როგორც სახელმწიფოს მხრიდან საჭირო მიმართულებების მხარდაჭერა, ასევე ბიზნესისგან განსაკუთრებული პასუხისმგებლობა. იმპორტიორებისა და სავაჭრო ქსელების წარმომადგენლებისგან მივიღეთ ინფორმაცია არსებული მდგომარეობის შესახებ. სრული პასუხისმგებლობით ვაცხადებ, რომ მარაგების მხრივ არანაირი დეფიციტი არ არსებობს. შეხვედრაზე შევთანხმდით, რომ მაქსიმალურ კოორდინაციაში ვიმუშავებთ იმპორტიორებთან და მიმწოდებლებთან", — თქვა მან.

საქართველოს დისტრიბუციის ასოციაციის ხელმძღვანელი, ივა ჭყონია ამბობს, რომ, ამ ეტაპზე, ბაზარზე "სტაბილური ვითარებაა". ჭყონია დასძენს, რომ ბოლო დღეებში სავაჭრო ქსელებში მიწოდების მხრივ შეფერხებები დაფიქსირდა, რაც მოსახლეობის ჭარბ შესყიდვებს უკავშირდება და დეფიციტს ხელოვნურად იწვევს.

"გარკვეულ ბრენდებთან დაკავშირებული ჩავარდნები გამოწვეულია ლოგისტიკური ჯაჭვის წყვეტიდან, მაგრამ თუ დღეს გარკვეული ბრენდის ზეთი, წიწიბურა თუ შაქარი მომხმარებელს არ დახვდათ დახლზე, ეს არ ნიშნავს, რომ ორ-სამ დღეში არ იქნება, ამიტომ მოვუწოდებ მოსახლეობას, რომ ჭარბი შესყიდვებით არ დააზიანონ არც საკუთარი თავი და არც სხვა მომხმარებელი", — თქვა მან.

სამინისტროში აღნიშნავენ, რომ შესაბამისი სამსახურები ქვეყანაში სურსათის შეფერხებული მიწოდებისა და მარაგების შევსების მონიტორინგს მუდმივ რეჟიმში ახორციელებენ.

სოციალურ ქსელში მოხმარებლები აქტიურად წერენ, რომ მაღაზიებში პროდუქტზე დეფიციტია. ასევე, აქვეყნებენ ფოტოებს, სადაც ჩანს, რომ დახლები ცარიელია.