დღევანდელ რუსეთში ფემინისტები ერთ-ერთ ყველაზე აქტიურ სოციალურ მოძრაობას ქმნიან, რომელიც ხელისუფლების პოლიტიკას ღიად უპირისპირდება. ამჯერად ისინი უკრაინაში რუსეთის შეჭრისა და პუტინის ომის წინააღმდეგ ილაშქრებენ.

ქვეყნის ოცდაათამდე ქალაქში რამდენიმე ათეული ფემინისტური ჯგუფი არსებობს. მათი უმეტესობა ანტისაომარ დემონსტრაციებშიც იღებს მონაწილეობას. ცოტა ხნის წინ ჯგუფებმა მსოფლიოში მცხოვრებ თანამოაზრეებს მოუწოდეს, პუტინის ხელისუფლების დაწყებულ სამხედრო აგრესიას ერთობლივი ძალებით აღუდგნენ წინ.

• პუტინის ომი უკრაინაში — განახლებადი

გავრცელებული განცხადება ამ დრომდე სიტუაციის ზოგადი შეჯამებით იწყება და აღნიშნულია, რომ ეს "სპეციალური ოპერაცია", რომელიც სუვერენული სახელმწიფოს "დენაციფიკაციასა და დემილიტარიზაციას" ისახავს მიზნად, დიდი ხანია, იგეგმებოდა. ამის პარალელურად კი, რუსეთის ხელისუფლება მოსახლეობას არწმუნებდა, რომ სამხედრო თავდასხმა გამორიცხული იყო.

"ვაცხადებთ — და პირველად არა — რომ ომი რუსეთის ხელისუფლების ინიციატივით ომი უკვე რვა წელია, მიმდინარეობს. კონფლიქტი დონბასში ყირიმის უკანონო ანექსირების შედეგია. ვფიქრობთ, რომ რუსეთსა და მის პრეზიდენტს არასდროს ადარდებდათ ლუჰანსკსა და დონეცკში მცხოვრები ადამიანების ბედი და რვა წლის შემდეგ რესპუბლიკების 'აღიარებაც' მხოლოდ წინაპირობა იყო, რათა უკრაინაში ქვეყნის გათავისუფლების მოტივით შეჭრილიყვნენ".

განცხადებაში ასევე აღნიშნულია, რომ ჯგუფების წევრები, "როგორც რუსეთის მოქალაქეები და ფემინისტები" ომს გმობენ, რადგან ფემინიზმი იმ პოლიტიკურ პლატფორმაზე დგას, რომელიც არ შეიძლება აგრესიული ომისა და სამხედრო ოკუპაციის გვერდით იყოს.

"ფემინისტური მოძრაობა რუსეთში მოწყვლადი ჯგუფებისა და თანასწორუფლებიანი საზოგადოებისთვის იბრძვის, სადაც ძალადობისა და სამხედრო კონფლიქტების ადგილი არაა.

"ომი ძალადობას, სიღარიბეს, იძულებით გადაადგილებას, მოსპობილ სიცოცხლეს, დაუცველობასა და უპერსპექტივო მომავალს ნიშნავს. ეს ყველაფერი ფემინისტური მოძრაობის ძირეულ ღირებულებებსა და მიზნებთან შეუთავსებელია. სამხედრო კონფლიქტი ამწვავებს გენდერული უთანასწორობის პრობლემასაც და წლების განმავლობაში ადამიანის უფლებების მონაპოვარს წყალში ყრის. ომი კი არა მხოლოდ ბომბებითა და ტყვიებით ძალადობას, არამედ სექსუალურ ძალადობასაც იწვევს: როგორც ისტორია გვაჩვენებს, კონფლიქტის პერიოდში ნებისმიერი ქალისათვის გაუპატიურების რისკი ერთიორად იზრდება. ამ და სხვა ბევრი მიზეზის გამო, რუსი ფემინისტები და ისინი, ვინც ფემინისტურ ღირებულებებს იზიარებენ, წინ უნდა აღუდგნენ ჩვენი ქვეყნის ხელისუფლების წამოწყებულ ომს".

ფემინისტური მოძრაობის თანამოაზრეები ასევე აღნიშნავენ, რომ ამჟამინდელი კონფლიქტი მთავრობის იდეოლოგების მიერ გამოცხადებული "ტრადიციული ღირებულებების" ფასადით მიმდინარეობს — იმ ღირებულებებით, რომელთა მსოფლიოში გასავრცელებლად რუსეთი ძალადობას იყენებს.

"ყველა, ვისაც კრიტიკული აზროვნების უნარი შესწევს, ხვდება, რომ ეს 'ტრადიციული ღირებულებები' მოიცავს გენდერულ უთანასწორობას, ქალების ექსპლუატაციას და სახელმწიფოს მხრიდან იმ ადამიანების შევიწროებას, რომელთა ცხოვრების სტილი, თვითიდენტიფიკაცია ან ქმედებები პატრიარქატულ ნორმებს ვერ ერგება".

დასასრულს, რუსული ფემინისტური ჯგუფები მთელ მსოფლიოში თანამოაზრეებს მოუწოდებენ, ომის წინააღმდეგ გაილაშქრონ და შესაბამისი კამპანიები აწარმოონ.

"შეუერთდით მშვიდობიან დემონსტრაციებს და აწარმოეთ ოფლაინ და ონლაინ კამპანიები უკრაინაში მიმდინარე ომის და პუტინის დიქტატურის წინააღმდეგ. გამოიყენეთ ფემინისტური ანტისაომარი წინააღმდეგობის მოძრაობის სიმბოლოები თქვენს მასალებში, ასევე ჰეშტეგები — #FeministAntiWarResistance და #FeministsAgainstWar.

"გაავრცელეთ ინფორმაცია უკრაინაში მიმდინარე ომისა და პუტინის აგრესიის შესახებ. ახლა საჭიროა, მთელი მსოფლიო უკრაინის გვერდით დადგეს და პუტინის რეჟიმს ყველანაირად დაუპირისპირდეს.

"გაუზიარეთ ეს განცხადება სხვებს. აუცილებელია, დაინახონ, რომ ფემინისტები ამ ომის და ნებისმიერი სხვა სამხედრო კონფლიქტის წინააღმდეგ ილაშქრებენ. ამასთან, იმის ჩვენებაც მნიშვნელოვანია, რომ რუსეთში ისევ არიან აქტივისტები, რომლებიც მზად არიან, პუტინის რეჟიმის წინააღმდეგ გაერთიანდნენ. ჩვენ ყველანი ახლა სახელმწიფოს მხრიდან დევნის საფრთხის ქვეშ ვართ და თქვენი დახმარება გვჭირდება".

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში