ხულოში ძალადობრივი, პრორუსული ალტ-ინფოს პარტია დაქირავებული ფართიდან გაუშვეს და ოფისი დაახურინეს. ინფორმაცია On.ge-ს სოლიდარობის თემის წევრმა, ედო ჯავახიძე დაუდასტურა. მისი თქმით, ორგანიზაციისთვის მიუღებელია ყოველგვარი ისლამოფობია და შუღლი. როგორც ჯავახიძემ თქვა, ინფორმაციის მიღებისთანავე შეატყობინეს ფართის მეპატრონეს ალტ-ინფოს იდეოლოგია და მანაც რეაგირება მოახდინა.

"ამ ადამიანებმა როგორც კი გახსნეს ოფისი ხულოს ერთ-ერთ ცენტრალურ ნაწილში ჩვენ ამის შესახებ მივიღეთ ინფორმაცია და სასწრაფოდ ჩვენ დავიწყეთ კამპანია, რომ არ არის მათი ადგილი ხულოში. ჩვენ გვქონდა ასეთი მოსაზრებაც, რომ განგებ პროვოკაციისთვის გახსნეს ხულოში ოფისი, ეს ადამიანები ქართველ მუსლიმებზე ძალიან ცუდ კონტექსტში საუბრობენ.

ამის შემდეგ დავუკავშირდი ოფისის მეპატრონეს, ვინც ფართის მეპატრონეა და როცა ავუხსენი, რაში იყო საქმე, მაშინვე მიიღო დაუყოვნებლივი გადაწყვეტილება რომ დაეტოვებინა ოფისი", — გვითხრა მან.

სოლიდარობის თემის წევრი ასევე ამბობს, რომ შესაძლებელია, ალტ-ინფო შეეცადოს ოფისი გახსნას სხვა მისამართზე, მაგრამ განმარტავს, რომ ამას ხელს შეუშლიან.

"შესაძლოა, ამ ადამიანებმა დაიწყონ აქტიურობა ხულოში ნახონ სადმე ფართი, რომ გააგრძელონ მათი მოღალატეობრივი საქმიანობა, მაგრამ გარწმუნებთ, რომ ხულოს ახალგაზრდობა და არა მხოლოდ, ამ ადამიანების იქ ყოფნას არ დაუშვებს. მიუღებელია ჩვენთან ვინმემ შუღლი შემოაგდოს. ცხოვრობენ სხვადასხვა რელიგიური იდენტობის მქონე ადამიანები და არასდროს პრობლემა არ ჰქონიათ. ნებისმიერი ფართის მეპატრონეს დაველაპარაკებით, რომ ამ ადამიანის ადგილი ხულოში არ არის", — ამბობს ედო ჯავახიძე.

ალტ-ინფო სხვადასხვა რეგიონში ხსნის ოფისებს. მაგალითად გორში მათ ოფისს წითელი საღებავი შეასხეს, ახალციხეში კი ბანერზე წარწერები გააკეთეს.

20 ნოემბერს ძალადობრივმა, ჰომოფობიურმა და პრორუსულმა ალტ-ინფომ პარტია დააფუძნა, რომელსაც კონსერვატიული მოძრაობა უწოდეს. პარტიის თავმჯდომარედ 5 ივლისის ძალადობის ერთ-ერთი ორგანიზატორი ზურაბ მახარაძე აირჩიეს.

5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას მოითხოვს, რადგან მიაჩნიათ, რომ მან მშვიდობიანი მოქალაქეების და ჟურნალისტების უსაფრთხოების დაცვა ვერ უზრუნველყო.