პრემიერმინისტრის, ირაკლი ღარიბაშვილის თქმით, ყველა ლოცულობს, რომ უკრაინაში ომი მალე დასრულდეს. პრემიერმინისტრი ამბობს, რომ იქ ადამიანები იღუპებიან და ეს ძალიან სამწუხარო ფაქტია. ომზე საუბრისას ღარიბაშვილს ისევ არ უხსენებია აგრესორი ქვეყანა რუსეთი და არც უკრაინის საგარეო საქმეთა სამინისტროს განცხადება შეუმჩნევია.

"ჩვენთვის ყველასთვის ომი კატეგორიულად მიუღებელია, რაც ხდება უკრაინაში, არის აბსოლუტურად მიუღებელი და ჩვენ, ყველანი ვლოცულობთ, რომ რაც შეიძლება მალე დასრულდეს ომი უკრაინაში და ტრაგედია, რომელიც ხდება ძალიან მალე დასრულდეს. ადამიანები იღუპებიან და ეს ძალიან სამწუხაერო ფაქტია", — თქვა მან.

ღარიბაშვილის განცხადებით, ამ დრომდე 140 ტონა ჰუმანიტარული ტვირთია უკრაინაში გაგზავნილი და ეს პროცესი გაგრძელდება.

"რა თქმა უნდა, ძალიან მძიმე საყურებელია ის, რაც ხდება უკრაინაში. კიდევ ერთხელ, ჩვენი მთავრობის სახელით მინდა გამოვხატო ჩვენი სოლიდარობა და მხარდაჭერა უკრაინელი ხალხის მიმართ და უკრაინის მიმართ. ჩვენ, რა თქმა უნდა, ყველა დონეზე მხარს ვუჭერთ უკრაინას, ყველა საერთაშორისო დონეზე, მხარი დავუჭირეთ პოლიტიკურად და რა თქმა უნდა, ამას გავაგრძელებთ. ამას გარდა, მინდა მოსახლეობას ვუთხრა, რომ დღეის მდგომარეობით, 140 ტონა ჰუმანიტარული ტვირთი გაიგზავნა დახმარების სახით უკრაინაში", — ამბობს პრემიერმინისტრი.

რუსეთის ვეტერინარული და ფიტოსანიტარული კონტროლის ფედერალურმა სამსახურმა, რომელიც მოქმედებს როგორც სადამსჯელო ორგანო რუსეთის ფედერაციის არამეგობრული სახელმწიფოების მიმართ სავაჭრო სანქციების დაწესებისთვის, 15 ქართულ საწარმოს რუსეთში რძის პროდუქტების გატანის ნებართვა მისცა.

Tass-ის ცნობით, როგორც დეპარტამენტში განმარტავენ, ეს გადაწყვეტილება მის ხელმძღვანელ სერგეი დანკვერტს, საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელს, ზურაბ ჩეკურაშვილსა და სურსათის უვნებლობის თავმჯდომარეს შორის 5 მარტის მოლაპარაკების შედეგად მიიღეს.

საქართველოს სურსათის ეროვნული სააგენტოს განცხადებით, რუსეთთან მოლაპარაკებები 2020 წლიდან მიმდინარეობდა და ქართული პროდუქტის ექსპორტზე გატანის გადაწყვეტილებაც სწორედ ამის საფუძველზე იქნა მიღებული.

• არ გვინდა ქართველი ხალხისგან ღალატი და ზურგში დანის ჩარტყმა ვიხილოთ — არახამია

უკრაინის საგარეო საქმეთა სამინისტრო რუსეთის მხრიდან საქართველოსთვის რძის პროდუქტების ექსპორტის შეთავაზებას და მხარეებს შორის მოლაპარაკებებს გამოეხმაურა და განაცხადა, რომ მაშინ, როცა უკრაინაში ომია და რუსი ჯარისკაცები მშვიდობიან მოქალაქეებს კლავენ, ეს ქმედება მიუღებელია. სამინისტროს თქმით, საქართველოს ხელისუფლებას დაავიწყდა 2008 წლის ომი და ახლა ცდილობს მომენტი საკუთარი ინტერესებისთვის გამოიყენოს.