ჩერნიგოვის ბავშვთა საავადმყოფოს ონკოლოგიურ განყოფილებაში პაციენტები კიბოს ებრძვიან. ქალაქი რუსი ჯარისკაცებით არის გარშემორტყმული და საავადმყოფოს ტკივილგამაყუჩებლებისა და საკვების მარაგი ეწურება.

"არ ვიცი, როგორ გადავრჩეთ, რადგან მეტი რესურსი არ გვაქვს", — განაცხადა ერთ-ერთმა ექიმმა, რომელთან ერთადაც პალატებში 11 ბავშვი, მათი მშობლები და სამედიცინო პერსონალია.

პოლონეთისა და სლოვაკეთის საავადმყოფოები თანახმა არიან, რომ ბავშვები გადაიყვანონ და მკურნალობის გაგრძელების პასუხისმგებლობა აიღონ, თუმცა პაციენტების გადაყვანა ვერ ხერხდება, რადგან ქალაქი ჩერნიგოვი ფაქტობრივად ალყაშია.

ფოტო: Anton Skyba

ჩერნიგოვი კიევიდან 150 კილომეტრში მდებარეობს და ბელორუსის საზღვართანაც ახლოსაა. რამდენიმე დღის წინ რუსმა ჯარისკაცებმა ქალაქი ალყაში მოაქციეს და მშვიდობიანი ადგილები დაბომბეს, მათ შორის სახლები, საბავშვო ბაღი და ბაზარი. ორი დღის წინ ონკოლოგიური საავადმყოფოდან 200 მეტრში რუსული ჭურვი ჩამოვარდა, რის შემდეგაც პაციენტები საავადმყოფოს სარდაფში გადაიყვანეს.

"კიბოთი დაავადებულ ადამიანებს ბევრი ტკივილგამაყუჩებელი სჭირდება, რომლებიც სხვა მედიკამენტებთან შედარებით უფრო რთულად იშოვება. ახლა კი ყველანაირი მარაგი გვეწურება", — ამბობს ერთ-ერთი ექიმი. სამედიცინო პერსონალის განცხადებით, საავადმყოფო ომისთვის მომზადებული არ იყო და თავშესაფარი ძალიან ცუდ მდგომარეობაშია, რასაც COVID-19-ის რისკებიც ემატება.

" აქ საკუთარი იარაღებით ვართ და მშობლები ჩვენი შვილების დაცვას ყველანაირად შევეცდებით. მზად ვართ, ჩვენი სიცოცხლე გავწიროთ, მაგრამ არ გვინდა, რომ ამ ყველაფერს ჩვენი შვილების სიცოცხლე შეეწიროს", — ამბობს ერთ-ერთი ბავშვის მამა.