ზელენსკის კრიტიკისა და ელჩის გაწვევის შემდეგ, საქართველოს მთავრობამ ჩამოთვალა, რა გაუკეთა უკრაინას. შესაბამისი პოსტი საგარეო საქმეთა სამინისტრომ გამოაქვეყნა, სადაც პუნქტებად ჩამოთვალა გადადგმული ნაბიჯები, რომლებიც სულ ექვსია და მათ შორის ერთი ანძის და მოედნის განათებაა.

"საქართველომ, უკრაინაში მიმდინარე მოვლენების გათვალისწინებით, მყისიერად დააფიქსირა მზაობა და განახორციელა ქვეყნის ჰუმანიტარული დახმარება სხვადასხვა მიმართულებით", — წერს საგარეო საქმეთა სამინისტრო.

ეს არ არის ერთადერთი პოსტი, რომელიც სამთავრობო გვერდებზე ელჩის გაწვევის შემდეგ გამოქვეყნდა. მთავრობის ფეისბუქზე დაიდო ვიდეო და ტექსტი, რომელშიც ვკითხულობთ, რომ "გაუგებარია უკრაინის პრეზიდენტის გადაწყვეტილება საქართველოდან ელჩის გაწვევის შესახებ". პოსტში ამკტიცებენ, რომ აგრძელებენ უკრაინის მხარდაჭერას, მაგრამ მოხალისეების წასვლას უკრაინაში საბრძოლველად იწუნებენ, მეტიც, იმეორებენ, რომ ეს "აღქმული როგორც საქართველოს საომარ მოქმედებებში ირიბი ჩართვა".

ტრადიციულად, სამთავრობო გუნდს არ დაავიწყდა ნაციონალური მოძრაობაც და ამჯერად მათ ომში ჩათრევის მცდელობა დააბრალა.

"საზოგადოებას გვსურს განვუმარტოთ, რომ სამწუხაროდ არ წყდება საქართველოს ომში ჩაბმის მცდელობები და პროვოკაციები, რომელშიც პირდაპირ ჩართულია დესტრუქციული ოპოზიცია და ნაციონალური მოძრაობა. ამის მიზანია საომარი მოქმედებების დაწყება ჩვენი ქვეყნის ტერიტორიაზე. ეს არის მართული პროცესი დესტრუქციული ოპოზიციის და მისი წევრების მხრიდან როგორც თბილისში, ისე კიევში", — განაცხადა დარჩიაშვილმა, რომელიც ადმინისტრაციის უფროსია.

მთავრობა იმასაც კი ამტკიცებს, რომ პირველივე დღიდან უკრაინას უწევს როგორც საერთაშორისო ასპარეზზე პოლიტიკურ მხარდაჭერას, ასევე ჰუმანიტარულ დახმარებას. არადა, რამდენიმე კვირის განმავლობაში სამთავრობო გუნდს სწორედ დუმილის გამო აკრიტიკებდნენ და პრემიერს სოლიდარობის გამოხატვას სთხოვდნენ.

შეგახსენებთ, რომ გუშინ და დღეს უკრაინის პრეზიდენტმა და პრემიერმინისტრმა საქართველოს მთავრობა ღიად გააკრიტიკეს და მათზე საუბრისას გამოიყენეს ფრაზები "ამორალური" და "იმედია ღარიბაშვილი გამოიჩენს გამბედაობას". კერძოდ, გუშინ უკრაინის პრემიერმა დატვიტა: "თავისუფლებისმოყვარე ქართველო ხალხო, დაეხმარეთ თქვენს პრემიერს სწორი გადაწყვეტილების მიღებაში". ასე გამოეხმაურა ის ქართველი მოხალისეების უკრაინაში არგაშვებას. დღეს კი ზელენსკიმ განაცხადა, რომ მოხალისეებისთვის ხელის შეშლის და სანქციებზე ამორალური პოზიციის გამო ქვეყნიდან ელჩს გაიწვევს.