უკრაინაში მიმდინარე პროცესებით განრისხებულმა უკრაინელმა მეზღვაურმა, რომელსაც სამართლიანობის აღდგენა სურდა, რუსი მაგნატის 7 მილიონად შეფასებული იახტის ჩაძირვა სცადა.

უკრაინელი მეზღვაური იახტის, სახელად Lady Anastasia-ს, მთავარი ინჟინერი იყო. მისი განცხადებით, გასულ შაბათ-კვირას ვიდეოს უყურა, რომელშიც ნაჩვენები იყო, თუ როგორ ეჯახება საკრუიზო რაკეტა კიევის ერთ-ერთ საცხოვრებელ კორპუსს.

უკრაინელ მეზღვაურს სჯეროდა, რომ ვიდეოში ნანახი რაკეტა იმ კომპანიის მიერ იყო დამზადებული, რომელიც თავის რუს დამქირავებელს ეკუთვნის. მან ჩათვალა, რომ Lady Anastasia-საც იგივე მიზნით გამოიყენებდნენ, ამიტომ უკრაინელების გადარჩენა და იახტის ჩაძირვა გადაწყვიტა.

სწორედ ამ მიზნით დააზიანა იახტა უკრაინელმა მეზღვაურმა და ეკიპაჟს მისი დატოვებისკენ მოუწოდა. მეზღვაურის ჩანაფიქრი ბოლომდე ვერ განხორციელდა, რადგან ეკიპაჟის წევრებმა და ადგილობრივი პორტის თანამშრომლებმა Lady Anastasia შეაკეთეს, თუმცა იახტა ნაწილობრივ მაინც ჩაიძირა.

"ჩემი დამქირავებელი კრიმინალია, ის უკრაინელი ხალხის დასახოცად იარაღს ყიდის", — განაცხადა ბრალდებულმა დაკავებისას. მეზღვაურის დამქირავებელი სამხედრო იარაღის კომპანია Rosoboronexport -ის აღმასრულებელი დირექტორია და ის საერთაშორისო ბაზარზე იარაღს მართლაც ყიდის.

სასამართლოში მეზღვაურმა განაცხადა, რომ იახტის მესაკუთრისთვის "მატერიალური ზიანის" მიყენება სურდა და მის სიცოცხლეს საფრთხის ქვეშ არასდროს ჩააგდებდა. "ისინი უდანაშაულო ადამიანებს ესხმიან თავს. არ ვნანობ, რაც გავაკეთე და ისევ გავიმეორებდი", — განაცხადა პროცესზე მეზღვაურმა.

უკრაინელი მეზღვაური გასულ კვირას გაათავისუფლეს და ჯერ გაურკვეველია, ბრალი წაუყენეს თუ არა.