ხუთშაბათს დილას ლიეტუვის პრეზიდენტმა, გიტანას ნაუსედამ უკრაინაში რუსეთის შეჭრასთან დაკავშირებით საგანგებო მდგომარეობა გამოაცხადა. ასეთივე გადაწყვეტილება მიიღო მოლდოვამაც.

ამის შესახებ გამოცემა ევროპული სიმართლე წერს.

"დღეს დილას რუსეთი თავს დაესხა უკრაინას, რითაც საერთაშორისო ნორმები დაარღვია. საერთაშორისო საზოგადოება ერთხმად გმობს საბრძოლო მოქმედებებს. სწორედ ამიტომ მოვიწვიე უსაფრთხოების უმაღლესი საბჭოს სხდომა. გადავწყვიტეთ, საგანგებო მდგომარეობა გამოვაცხადოთ", — თქვა მოლდოვის პრეზიდენტმა, მაია სანდუმ.

დღესვე მოლდოვის უსაფრთხოების საბჭო კრიზისთან გამკლავების გზებზე იმსჯელებს. სანდუ თავდაცვის ძალების პატრულირებასაც გააძლიერებს, რათა რუსეთის პროვოკაციები თავიდან აირიდოს.

"ჩვენ რუსეთის კრიმინალური მოქმედებების მომსწრე ვართ და ამ სამხედრო აგრესიას გულგრილები ვერ შევხვდებით. რუსეთის აგრესია მილიონობით უდანაშაულო სიცოცხლეს ემუქრება და საერთაშორისო ნორმებს არღვევს", — თქვა ლიეტუვის პრეზიდენტმა.

"მიუხედავად იმისა, რომ ლიეტუვის სტაბილურობას პირდაპირ არაფერი ემუქრება, სიტუაცია უნდა შევაფასოთ და სოლიდარობა გამოვიჩინოთ", — დაამატა პრეზიდენტმა.

ლიეტუვა საზღვარს როგორც რუსეთთან, ასევე ბელარუსთან იზიარებს, სადაც ბოლო თვეებში რუსეთმა 30 000-ზე მეტი ჯარისკაცი შეიყვანა.

ბალტიის ქვეყნებმა დღეს საერთო განცხადება გამოაქვეყნეს და რუსეთის მიმართ მკაცრი სანქციები მოითხოვეს.