უკრაინის მიმართ რუსეთის აგრესიის საპასუხოდ, სანქციებს აწესებენ ავსტრალია, კანადა და იაპონიაც. სანქციები უკვე დააწესა დიდმა ბრიტანეთმა, ევროკავშირმა და ამერიკის შეერთებულმა შტატებმა.

ავსტრალიის პრემიერმინისტრმა, სკოტ მორისონმა თქვა, რომ დააწესებს ქვეყანაში მოგზაურობის აკრძალვასა და მიზნობრივ ფინანსურ სანქციებს რუსეთის ფედერაციის უშიშროების საბჭოს 8 წევრზე, სახელმწიფო მაღალჩინოსნებისა და თავდაცვის ხელმძღვანელების ჯგუფზე.

კანბერა ეკონომიკურ სანქციებს დაუწესებს სეპარატისტების მიერ კონტროლირებად ლუგანსკისა და დონეცკის რეგიონებს. სანქციები შეეხება ტრანსპორტის, ენერგეტიკის, ტელეკომუნიკაციების, ნავთობის, გაზის და მინერალების მარაგებს.

სანქციებს აწესებს კანადაც, პრემიერმინისტრ ჯასტინ ტრუდოს განცხადებით, კანადელებს აღარ შეეძლებათ ე.წ. დონეცკისა და ლუგანსკის სახალხო რესპუბლიკებთან ფინანსური ურთიერთობა.

კანადა გეგმავს იმ პარლამენტარების სანქცირებას, რომლებმაც ე.წ. დონეცკისა და ლუგანსკის სახალხო რესპუბლიკების დამოუკიდებლობას მხარი დაუჭირეს და ასევე ორი სამთავრობო ბანკის სანქცირებასაც.

"ასევე კანადა რეგიონში დამატებით 460 სამხედროს გაგზავნის "დამშვიდების ოპერაციის" ფარგლებში. ეს გულისხმობს მეტი ჯარისკაცის გაგზავნას ლატვიაში, ასევე დამატებითი ფრეგატისა და საზღვაო საპატრულო თვითმფრინავის განთავსებას", — თქვა ტრუდომ.

რუსეთის წინააღმდეგ სანქციებს უერთდება იაპონიაც, პრემიერმინისტრმა, ფუმიო კაშიდამ განაცხადა, რომ აიკრძალება რუსული ობლიგაციების გამოშვებას იაპონიაში, ასევე შეაჩერებს ვიზების გაცემას და გაუყინავს აქტივებს მათ, ვინც აღიარებს დონეცკისა და ლუგანსკის ოლქების "დამოუკიდებლობას".

"რუსეთის ქმედებები აშკარად აზიანებს უკრაინის სუვერენიტეტს და ეწინააღმდეგება საერთაშორისო კანონს. ჩვენ კიდევ ერთხელ ვაკრიტიკებთ ამ ნაბიჯებს და მტკიცედ მოვუწოდებთ რუსეთს დაუბრუნდეს დიპლომატიურ დისკუსიებს", — აცხადებს ის.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.