თეთრი სახლის ცნობით, აშშ-ის პრეზიდენტი, ჯო ბაიდენი გამოსცემს ბრძანებას, რომელიც უკრაინის ოკუპირებულ ტერიტორიებზე, თვითგამოცხადებულ ლუგანსკსა და დონეცკში აშშ-ის მოქალაქეებისთვის ახალ ინვესტიციებს, ვაჭრობასა და დაფინანსებას აკრძალავს. ამის შესახებ მათ ოფიციალური განცხადება გაავრცელეს.

"რუსეთისგან ასეთ ნაბიჯს ველოდით და მზად ვართ დაუყოვნებლივ ვუპასუხოთ. პრეზიდენტი ბაიდენი მალე გამოსცემს აღმასრულებელ ბრძანებას, რომელიც აშშ-ის მოქალაქეებს აუკრძალავს ახალ ინვესტიციებს, ვაჭრობასა და დაფინანსებას პირებზე უკრაინის რეგიონებში, ე.წ. ლუგანსკისა და დონეცკის სახალხო რესპუბლიკებში ან მათგან.

ეს, ასევე, უზრუნველყოფს სანქციების დაწესებას ნებისმიერ პირზე, რომელიც უკრაინის ამ ადგილებში ოპერირებას გადაწყვეტს. ეს ზომები ცალკეა და დამატებითია იმ სწრაფ და მწვავე ეკონომიკურ სანქციებზე, რომელსაც პარტნიორებთან ერთად ვამზადებთ იმ შემთხვევაში, თუ რუსეთი კიდევ შეიჭრება უკრაინაში", — ვკითხულობთ განცხადებაში.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

ამ "თხოვნით" პუტინს თვითაღიარებული რესპუბლიკების ლიდერებმა და რუსეთის დუმის დეპუტატებმა მიმართეს. პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურენ მსოფლიო ლიდერები.

პუტინის გადაწყვეტილება დაგმო საქართველომაც. ტვიტერზე საგარეო საქმეთა მინისტრმა დაწერა, რომ დონეცკისა და ლუგანსკის აღიარება 2008 წელს აფხაზეთისა და ცხინვალის აღიარების სცენარია. საქართველოს პრეზიდენტმაც განაცხადა, რომ ეს ქმედებები იმეორებს სცენარს, რამაც გამოიწვია ჩვენი ტერიტორიის 20%-ის ოკუპაცია.

გაიგეთ მეტი: