NATO-ს წევრი ქვეყნების თავდაცვის მინისტრები უკრაინასა და მის გარშემო არსებულ ვითარებასთან დაკავშირებით ერთობლივ განცხადებას ავრცელებენ. ისინი შეშფოთებას გამოხატავენ რუსეთის ქმედებების გამო და მოუწოდებენ მას აირჩიოს დიპლომატიის გზა და გაიყვანოს უკრაინის საზღვრიდან სამხედრო ძალები.

"ჩვენ ღრმად შეშფოთებულები ვართ რუსეთის ფართომასშტაბიანი, არაპროვოცირებული და გაუმართლებელი სამხედრო ფორმირებით უკრაინის გარშემო და ბელარუსში. მკაცრად მოვუწოდებთ რუსეთს, აირჩიოს დიპლომატიის გზა, დაუყონებლივ შეწყვიტოს სამხედრო ძალების თავმოყრა და გაიყვანოს ისინი უკრაინიდან საერთაშორისო ვალდებულებების შესაბამისად. ვრჩებით რუსეთის მიმართ ჩვენი ორმხრივი მიდგომის ერთგული: ძლიერი შეკავება და თავდაცვა, შერწყმული დიალოგისადმი ღიაობასთან", — ვკითხულობთ განცხადებაში.

NATO-ს წევრი ქვეყნების თავდაცვის მინისტრები აცხადებენ, რომ რუსეთის ქმედებები სერიოზულ საფრთხეს უქმნის ევროატლანტიკურ უსაფრთხოებას. მათი თქმით, მოკავშირეების დასაცავად დამატებით ძალებს განათავსებენ.

"ყველა მოკავშირის დასაცავად განვათავსებთ დამატებით სახმელეთო ძალებს ალიანსის აღმოსავლეთ ნაწილში, ასევე დამატებით საზღვაო და საჰაერო საშუალებებს, როგორც ამას მოკავშირეები აცხადებენ და გავზრდით ჩვენი ძალების მზადყოფნას. ჩვენი ზომები არის და რჩება პრევენციულად, პროპორციულად და არაესკალაციურად. მზად ვართ კიდევ უფრო გავაძლიეროთ ჩვენი თავდაცვითი და შემაკავებელი პოზიცია, რათა ვუპასუხოთ ყველა გაუთვალისწინებელ შემთხვევას", — აცხადებენ ისინი.

განცხადებაში კიდევ ერთხელ ხაზგასმულია, რომ NATO მხარს უჭერს უკრაინის სუვერენიტეტს და ტერიტორიულ მთლიანობას, ამასთანავე, რჩება ფუნდამენტური პრინციპის ერთგულად, რომ თითოეულ ქვეყანას აქვს უფლება თავად აირჩიოს საკუთარი უსაფრთხოების ზომები. განცხადების მიხედვით, რუსეთის ნებისმიერი შემდგომი აგრესია უკრაინის წინააღმდეგ მასიური შედეგების მომტანი იქნება.

"რუსეთს მივმართეთ ევროატლანტიკურ რეგიონში ყველა ერის უსაფრთხოების გაძლიერების წინადადებით და ველოდებით პასუხს. ჩვენ არაერთხელ შევთავაზეთ და ვაგრძელებთ შემდგომი დიალოგის შეთავაზებას NATO-რუსეთის საბჭოს მეშვეობით. მტკიცედ მოვუწოდებთ რუსეთს, აირჩიოს დიპლომატია და დეესკალაცია", — ვკითხულობთ განცხადებაში.

რუსეთის თავდაცვის სამინისტრო ამბობს, რომ უკრაინის საზღვართან მყოფი ჯარები წვრთნების დასრულების შემდეგ მუდმივი განლაგების პუნქტებს უბრუნდებიან. სამინისტროს ოფიციალური წარმომადგენლის, გენერალ-მაიორ იგორ კონაშენკოვის თქმით, სამხრეთ და დასავლეთის სამხედრო ოლქების ზოგიერთმა ქვედანაყოფმა დაასრულა წვრთნები და ბაზაზე დაბრუნება უკვე დაიწყო.

მას შემდეგ, რაც რუსეთმა თქვა, რომ ჯარები უკრაინის საზღვრის მიმდებარე ტერიტორიიდან გაჰყავს, უკრაინის პრეზიდენტმა, ვოლოდიმირ ზელენსკიმ განაცხადა, რომ ამას ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.