სპეციალური პენიტენციური სამსახურის განცხადებით, ყოფილი პრეზიდენტის, მიხეილ სააკაშვილის მიმართ, რაიმე სახის შეზღუდვა არ დაწესებულა. როგორც პენიტენციურში განმარტავენ, მსჯავრდებული, რომელიც სასჯელს დახურული ტიპის თავისუფლების აღკვეთის დაწესებულებაში იხდის თავსდება საკანში, უფლება აქვს, ერთი თვის განმავლობაში ჰქონდეს ერთი ხანმოკლე პაემანი.

მათი თქმით, სააკაშვილი ინფორმირებულია, რომ ერთი წლის განმავლობაში შეუძლია ჰქონდეს ორი ხანგრძლივი პაემანი, ხოლო წახალისების ფორმით — წელიწადში ერთი, დამატებითი, ხანგრძლივი პაემანი.

"მსჯავრდებული მ. სააკაშვილი, საკუთარი უფლებების შესახებ, სრულად ინფორმირებულია. აღსანიშნავია, რომ სპეციალური პენიტენციური სამსახურის გენერალური დირექტორის ბრძანების შესაბამისად, მსჯავრდებულს სასჯელის შემდგომი მოხდა, დახურული ტიპის თავისუფლების აღკვეთის დაწესებულებაში განესაზღვრა. პატიმრობის კოდექსის 65-ე მუხლის თანახმად კი, ის მსჯავრდებული, რომელიც სასჯელს დახურული ტიპის თავისუფლების აღკვეთის დაწესებულებაში იხდის თავსდება საკანში, უფლება აქვს, ერთი თვის განმავლობაში ჰქონდეს ერთი ხანმოკლე პაემანი, ხოლო წახალისების ფორმით – თვეში ერთი, დამატებითი, ხანმოკლე პაემანი", — ნათქვამია განცხადებაში.

უწყების ინფორმაციით, სააკაშვილი იმყოფება N12 პენიტენციური დაწესებულების სამედიცინო პერსონალის მუდმივი მეთვალყურეობის ქვეშ.

"მისივე თანხმობის შესაბამისად, უტარდება ლაბორატორიული მაჩვენებლების მონიტორინგი და ინსტრუმენტული დიაგნოსტიკა, იღებს სხვადასხვა ექიმ-სპეციალისტთა რეგულარულ კონსულტაციებს და მკურნალობს დანიშნულების შესაბამისად. აქვე, აღსანიშნავია, რომ მსჯავრდებული უარს აცხადებს ფსიქოთერაპევტის კონსულტაციაზე", —ვკითხულობთ განცხადებაში.

დღეს სააკაშვილმა Facebook-ზე დაწერა, რომ მას შემდეგ, რაც უკრაინის პროკურატურამ ის დამნაშავედ ცნო, გამოუცხადეს, რომ ოჯახის წევრებთან პაემნების შესაძლებლობა, არა კვირაში ერთხელ, არამედ თვეში ერთხელ ექნება.

10 თებერვალს სააკაშვილის ადვოკატმა, ნიკა გვარამიამ განაცხადა, რომ უკრაინის პროკურატურამ ექსპრეზიდენტი დაზარალებულად ცნო. მისი თქმით, როცა მათი მოქალაქის მიმართ სავარაუდო წამებისა და არაადამიანური მოპყრობის დანაშაული იკვეთება, უკრაინის კანონმდებლობა საქმის აღძვრის შესაძლებლობას იძლევა.

14 იანვარს სააკაშვილის უკრაინელმა ადვოკატმა მიხეილ ევგენი გრუშოვეციმ თქვა, რომ უკრაინაში საქართველოს პენიტენციური სისტემის მაღალჩინოსნების მიმართ რამდენიმე სისხლის სამართლის საქმეა აღძრული.