ლეიობორისტული პარტიის ლიდერს, შალვა ნათელაშვილს კორონავირუსი დაუდასტურდა. მისი თქმით, სამშაბათს პარლამენტის სხდომაზე აპირებდა დასწრებას.

"დღეს საღამოს დამიდასურდა ომიკრონი. პროცესი მიდის უაღრესად მსუბუქად. სრული დატვირთვით ვმუშაობ რამდენიმე დღიანი კარანტინის რეჟიმით. არადა ყველაზე ნაკლებად ველოდებოდი ამას. სამშაბათს პარლამენტის სხდომაზე ვაპირებდი დასწრებას, ხოლო შემდეგ ჩემი დაბადების დღეც დგებოდა. არაა პრობლემა, ცხოვრება გრძელდება და მოკლე ხანში ისევ გამოგეცხადებით", — წერს ის ფეისბუქგვერდზე.

ლეობორისტული პარტიის ლიდერმა 10 თებერვალს განაცხადა, რომ ის პარლამენტში შედის. მისი თქმით, დღეს ერთადერთი სწორი გადაწყვეტილებაა.

7 თებერვალს საპროცედურო საკითხთა კომიტეტმა ლეიბორისტული პარტიის ლიდერის, შალვა ნათელაშვილის, დროას ლიდერის, ელენე ხოშტარიასა და ლელოს ლიდერის, ბადრი ჯაფარიძისთვის საპარლამენტო მანდატის შეწყვეტას მხარი დაუჭირა. მანდატების შეწყვეტის საკითხზე საბოლოო გადაწყვეტილებას მომავალ კვირას, პლენარულ სხდომაზე მიიღებენ.

10 იანვარს ლეიბორისტული პარტიის ლიდერმა განაცხადა, რომ პარტია პარლამენტში შევიდოდა, თუ ფეისბუქგამოკითხვაში მხარდამჭერები ამისკენ მოუწოდებდნენ. ფეისბუქზე მან დასვა კითხვა — "მას შემდეგ რაც ყველა ოპოზიციურმა პარტიამ პარლამენტში შესვლით აზრი დაუკარგა ბოიკოტს, ფიქრობთ თუ არა, რომ ლეიბორისტულმა პარტიამ უნდა გამოიყენოს თავისი მანდატი და შესაბამისად, მე შევიდე პარლამენტში?" — და თქვა, რომ პარტია საბოლოო გადაწყვეტილებას სწორედ დაფიქსირებული პოზიციის გათვალისწინებით მიიღებდა.

ნათელაშვილმა, რომელიც პარლამენტში შესვლის კატეგორიული წინააღმდეგი იყო და ოპოზიციას ამ გადაწყვეტილების გამო აკრიტიკებდა, 6 იანვარს განაცხადა, რომ პარლამენტში შესვლა მისთვის "სიკვდილი და შეურაცხყოფაა", მაგრამ როცა საქმე ქვეყნის ინტერესებზეა "პირადი ემოცია და შეურაცხყოფა ხანდახან მეორეხარისხოვანია".