ჯანდაცვის სამინისტროს ინფორმაციით, კორონავირუსით ინფიცირებულებისა და კონტაქტების იზოლაციისა და კარანტინის ვადები მცირდება. პროფესიების მიხედვით, უსიმპტომო პაციენტებისთვის იზოლაციის ვადა იქნება 6 ან 7 დღე. სიმპტომიანებისთვის კი იზოლაციის ვადად კვლავ 10 დღე რჩება.

პერსონალის დეფიციტის შემთხვევაში, იზოლაცია სრულდება დადასტურებიდან მე-6 დღეს ისეთ სამსახურებში დასაქმებულებისთვის, როგორიცაა:

  • სამედიცინო დაწესებულებები;
  • ზოგადსაგანმანათლებლო დაწესებულებები;
  • შინაგან საქმეთა, იუსტიციისა და თავდაცვის სამინისტროების სისტემები;
  • სახელმწიფო უსაფრთხოების სამსახური;
  • საქართველოს პროკურატურის სისტემა;
  • ფინანსთა სამინისტროს სსიპ შემოსავლების სამსახური და ფინანსთა სამინისტროს საგამოძიებო სამსახური.

ამ შემთხვევაში იზოლაციის დასრულებისთვის აუცილებელია სწრაფი ტესტის უარყოფითი პასუხი, სიმპტომების გასვლიდან 24 საათი უნდა იყოს გასული და მკაცრად რეკომენდირებულია პირბადის ტარება 5 დღის განმავლობაში.

რაც შეეხება სხვა უსიმპტომო პაციენტებს, მათთვის იზოლაცია დასრულდება დადასტურებიდან 7 დღის შემდეგ. ამ შემთხვევაში სწრაფი ტესტი არ არის საჭირო.

საშუალო და მძიმედ მიმდინარე შემთხვევებისთვის იზოლაციის ვადა რჩება უცვლელი — დადასტურებიდან მინიმუმ 10 დღე.

კარანტინის ვადები მცირდება მათთვის ვისაც კონტაქტი ჰქონდა ინფიცირებულთან და არ არიან ვაქცინირებულები, ან სრულად ვაქცინირებულები. იზოლაციის ვადა 8 დღის ნაცვლად 5 დღე იქნება. სამინისტრო მათ აძლევთ რეკომენდაციას, 6-12 დღის განმავლობაში ატარონ პირბადე.

იგივე ვრცელდება, ბუსტერ დოზის არმქონე პირებისთვის, თუ ვაქცინის მე-2 დოზის მიღებიდან გასულია 90 დღეზე მეტი. ასევე კარანტინის აღნიშნული წესები ვრცელდება პირებზე, ვისაც კოვიდის ინფექციის გადატანიდან გაუვიდა 60 დღიანი პერიოდი.

კარანტინში არ იქნებიან, თუმცა პირბადის ტარება მკაცრადაა რეკომენდირებული კონტაქტის შეწყვეტიდან მომდევნო 10 დღე:

  • ბუსტერ დოზით ვაქცინირებულ პირებისთვის;
  • სრულად ვაქცინირებულ პირებისთვის, ვაქცინის მეორე დოზის მიღებიდან 14-90 დღის განმავლობაში;
  • ასევე პირებისთვის, კოვიდის ინფექციის გადატანიდან 60 დღის განმავლობაში.

იზოლაციის და კარანტინის განახლებული ვადები 10 თებერვლამდე ინფიცირებული და კონტაქტირებული პირებისთვისაც მოქმედებს.