2022 წლის ზამთრის ოლიმპიური თამაშების დაწყებამდე მსახიობმა და საბრძოლო ხელოვნების გამორჩეული სტილით ცნობილმა ჯეკი ჩანმა ჩინეთის დიდი კედლის გავლით ოლიმპიური ჩირაღდნის მასპინძელ ქალაქში ჩატანაში მიიღო მონაწილეობა.

67 წლის ჩანი დილის 4 საათზე ადგა, რათა ჩირაღდნის ესტაფეტაში ჩართულიყო.

"ჩემთვის ეს მეოთხე ოლიმპიადაა", — ამბობს მსახიობი, — "ძალიან მიხარია და თან, მცივა".

ჩანს გზად ჩინელი ოლიმპიური ჩემპიონებიც შეუერთდნენ.

ოლიმპიური ცეცხლმა, ჩინეთის სხვადასხვა პროვინციის გავლით, მოგზაურობა პეკინის სტადიონზე დაასრულა. ესტაფეტის ხანგრძლივობა, კორონავირუსის პანდემიის გამო, სამ დღემდე შემცირდა.

პანდემიამ გავლენა იქონია თამაშების ფორმატზეც — ოლიმპიადის მონაწილეები და პერსონალი აუდიტორიისგან განცალკევებულია, ხოლო მაყურებლების რაოდენობა — მკაცრად შეზღუდული. თამაშებზე დასასწრებად არც ბილეთები გაყიდულა.

აღსანიშნავია, რომ ჩანმა მონაწილეობა მიიღო 2008 წლის ზაფხულის ოლიმპიური თამაშების გახსნისა და დახურვის ცერემონიებშიც, რომელიც ასევე პეკინში გაიმართა. მსახიობმა მაშინ საგანგებოდ ოლიმპიადისთვის შექმნა სიმღერა, რომელიც გახსნის ცერემონიაზე შეასრულა.