რას ნიშნავს საკულტო სერიალი? სტრიმინგ სერვისების ხანა ახალი შოუების სიმრავლით გამოირჩევა, თუმცა საკითხავია, რამდენი მათგანი გაუძლებს დროს. საკულტო სერიალები კი ათწლეულების განმავლობაში არ კარგავს ფანებსა და აქტუალობას: მათ განხილვებს დღემდე წააწყდებით სხვადასხვა ბლოგებზე, თემატურ ჯგუფებსა თუ სოციალურ ქსელებში.

ამ სტატიაში იმ საკულტო სერიალების ათეულს (ნუმერაცია პირობითია) გთავაზობთ, რომლებიც იმსახურებს, რომ ქართველ მაყურებელში მეტი პოპულარობით სარგებლობდეს:

1. ციცინათელა / Firefly

2002 წელს Fox-ზე გამოსული ეს საკულტო სერიალი მხოლოდ ერთი სეზონი გაგრძელდა, თუმცა სამეცნიერო ფანტასტიკის მოყვარულებისთვის დღემდე ერთ-ერთ საყვარელ შოუდ რჩება. ამ კოსმოსური ვესტერნის სიუჟეტი 2517 წელს მალ რეინოლდსისა და მისი ეკიპაჟის გარშემო ვითარდება. სამეცნიერო ფანტასტიკისა და ვესტერნის ჭკვიანური ფიუჟენი შოუს დინამიკურსა და კიდევ უფრო საინტერესოს ხდის. სერიალის შემქმნელი ამერიკელი სცენარისტი და რეჟისორი ჯოს ვიდონია. ციცინათელას დახურვის შემდეგ სიუჟეტის დასასრულებლად ფილმი Serenity გამოვიდა.

2. სასწრაფო / ER

NBC-ის საკმაოდ რეალისტური სამედიცინო დრამა 28 წლის წინ დაიწყო და 15 სეზონი გაგრძელდა. სწორედ სასწრაფომ აქცია ვარსკვლავებად ჯორჯ კლუნი და ჯულიანა მარგულისი. სასწრაფო გამოირჩევა კომპლექსური პერსონაჟებითა და ისეთი სოციალური თემებით, როგორებიცაა რასიზმი, ნივთიერებებზე დამოკიდებულება, აივ ინფექცია და ოჯახში ძალადობა.

3. ვარსკვლავური კრეისერი გალაქტიკა / Battlestar Galactica

ამ შოუს ორი ვერსია არსებობს: ორიგინალი 1978-1979 წლებში გამოვიდა, მაგრამ ამჯერად ჩვენ 2004 წელს გამოსულ განახლებულ ვერსიაზე ვსაუბრობთ. ამერიკული სამხედრო-სამეცნიერო ფანტასტიკა დღემდე ჟანრის ერთ-ერთ საუკეთესო შოუდ ითვლება. სერიალის სიუჟეტი ადამიანებისა და საილონების ომის გარშემო ვითარდება. ვარსკვლავური კრეისერი გალაქტიკა 19-ჯერ იყო Emmy-ის ნომინანტი სხვადასხვა კატეგორიაში და Time-მა ის ისტორიაში საუკეთესო 100 სერიალშიც კი შეიყვანა.

4. ბაფი — ვამპირებზე მონადირე / Buffy The Vampire Slayer

შოუ ზემოთ უკვე ნახსენები ცნობილი რეჟისორის, ჯოს ვიდონის კიდევ ერთი წარმატებული პროექტია. სიუჟეტი ბაფისა და მისი მეგობრების გარშემო ვითარდება. ახალგაზრდა გოგო და მისი გუნდის წევრები ვამპირებსა და სხვადასხვა ურჩხულს ებრძვიან. ბაფის სამყარო საოცრად კომპლექსურია: აქ ყველაფერი თეთრი და შავი არ არის. პროტაგონისტებსაც არაერთი ნაკლი აქვთ, ხშირად უშვებენ შეცდომებს. სხვათა შორის, ბაფი — ვამპირებზე მონადირე აკადემიურ წრეებში პოპკულტურის ყველაზე განხილვადი ნაწარმია. ტელევიზიის ისტორიაში ერთ-ერთი პირველი ლესბოსელი წყვილიც სწორედ ამ შოუში გამოჩნდა.

5. ექვსი ფუტი მიწის ქვეშ / Six Feet Under

ალან ბოლის დრამა დისფუნქციური ოჯახის ისტორიის შესახებ ორ ათწლეულზე მეტი ხნის წინ გამოვიდა ეკრანებზე. ალან ბოლი გავლენიანი ოსკაროსანი სცენარისტია. ამერიკის კინოაკადემიის ეს პრესტიჟული ჯილდო ბოლმა ცნობილი ფილმისთვის ამერიკული სილამაზე მიიღო.

სერიალში მოვლენები ფიშერების ოჯახის გარშემო ვითარდება. ოჯახს არც მეტი, არც ნაკლები, სახლში დამკრძალავი ბიურო აქვს გახსნილი. ალან ბოლის პერსონაჟები საინტერესო განვითარებით, კომპლექსური ხასიათით გამოირჩევიან. შოუ ტელევიზიის ისტორიაში გამოირჩევა გლოვისა და დანაკარგის ემოციური აღწერით და ასევე უცნაური, თუმცა ფრიად მოქნილი იუმორით. HBO-ს სერიალი არაერთხელ იყო წარდგენილი ემისა თუ ოქროს გლობუსზე. 2001 წელს მოიგო კიდეც ოქროს გლობუსი საუკეთესო დრამატული სერიალისთვის. შოუს ფინალი კი დღემდე ისტორიაში ერთ-ერთ საუკეთესო და ემოციურ დასასრულად ითვლება.

6. დასავლეთის ფრთა / The West Wing

ცნობილი სცენარისტისა და რეჟისორის, აარონ სორკინის პოლიტიკური დრამა ეკრანებზე 1999 წელს გამოჩნდა. შოუს მთავარი პერსონაჟები ამერიკის ფიქციური პრეზიდენტი, ჯოსაია ბარტლეტი და ოვალური ოფისის თანამშრომლები არიან. სერიალი ყველა დროის საუკეთესოთა სიაში ჰყავთ შეყვანილი ისეთ გამოცემებს, როგორებიცაა Time, TV Guide, Empire, Rolling Stones.

შესაძლოა, დასავლეთის ფრთა ზუსტად არ ასახავს თეთრი სახლის რეალობას, თუმცა, ბევრი მაყურებლის აზრით, აშშ-ს ასეთი ადამიანები რომ მართავდნენ, სულაც არ იქნებოდა ცუდი.

დასავლეთის ფრთა გამოირჩევა ე.წ. Walk and Talk სტილით, როდესაც პერსონაჟები სიარულის პარალელურად საუბრობენ. ეს მეთოდი აარონ სორკინს ძალიან უყვარს და სერიალშიც აქტიურად იყენებს, რითაც უბრალო სცენებსაც კი მეტად დინამიკური ხდება.

7. საინფელდი / Seinfeld

არაერთი ადამიანი ამ სერიალს თანამედროვე სიტკომების მამად მიიჩნევს. ცნობილი კომიკოსის, ჯერი სეინფელდის და მისი მეგობრების: ჯორჯის, ელეინისა და კრეიმერის ისტორია ეკრანებზე 1989 წელს გამოვიდა და 9 სეზონი გაგრძელდა. საინფელდის გავლენა იგრძნობა ისეთ ცნობილ სერიალებში, როგორებიცაა Friends, Curb Your Entusiasm, It’s Always Sunny In Philadelphia და ა.შ.

ტელევიზიის ისტორიაში ერთ-ერთ საუკეთესო სერიალად მიჩნეული საინფელდი გამოირჩევა პერსონაჟებით, რომლებიც არც ისე კარგი ადამიანები არიან, თუმცა მაყურებელი ხშირად ახერხებს მათ ცალკეულ თვისებებთან საკუთარი თავის იდენტიფიკაციას.

8. კლინიკა / Scrubs

სამედიცინო დრამა-კომედია ეკრანებზე 2001 წელს გამოჩნდა და მაყურებლის სიყვარული მალევე დაიმსახურა. წლების განმავლობაში შოუ არაერთ ჯილდოზე იყო წარდგენილი. ჯერ მარტო Emmy-ის სხვადასხვა კატეგორიაში 17-ჯერ იყო ნომინირებული.

კლინიკა გამორჩეულია კეთილი და უკიდურესად სასაცილო პერსონაჟებით და შეუძლებელია მაყურებელს თითოეული მათგანი არ შეუყვარდეს, თავად ბუზღუნა და უხეში ექიმი პერი კოქსიც კი. გარდა ამისა, მთავარი პერსონაჟის, ჯეიდის ვიზუალურად გამოხატული ფანტაზიები ცალკე აღებულიც კი ბევრ სერიალს სჯობს.

ამ შოუსგან ნამდვილად მიიღებთ ყველაფერს, რაც შეიძლება სერიალისგან ისურვოთ: სუნთქვის შეკვრამდე სიცილს, გულის გამთბობ მეგობრობასა და ხშირად ხმამაღლა ტირილსაც კი.

9. მოსმენა / The Wire

HBO-ს ეს სერიალი 2002-2008 წლებში გადიოდა. შოუს მიმდინარეობისას საშუალო რეიტინგი ჰქონდა და რაიმე განსაკუთრებული ჯილდოები არ მოუგია, თუმცა დროის გასვლასთან ერთად მოსმენა საკულტო სერიალად იქცა. დღესდღეობით ბევრი გამოცემა მას სერიალების ისტორიაში საუკეთესოდ ან მინიმუმ ერთ-ერთ საუკეთესოდ მაინც მიიჩნევს.

მოსმენა მოგვითხრობს ბალტიმორში, ნარკოტიკების გარშემო განვითარებულ მოვლენებზე. სიტუაცია დანახულია სხვადასხვა მხრიდან: პოლიციელების, ნარკოტიკით მოვაჭრეებისა და მომხმარებლების თვალით. გარდა ამისა, შოუში განხილულია ბალტიმორის მთავრობა და იქ არსებული ბიუროკრატია, სკოლები და მედია.

10. საიდუმლო მასალები / The X-Files

ალბათ, იშვიათია სამეცნიერო ფანტასტიკის ჟანრის მოყვარული ადამიანი, ვისაც ფიქციური პერსონაჟების, ფოქს მალდერისა და დანა სკალის იდუმალებით მოცული ისტორიების შესახებ, სულ მცირე, არ სმენია მაინც. კრის კარტერის სერიალი 1993 წელს გამოჩნდა ეკრანებზე და სიუჟეტმა მალევე ჩაითრია ისეთი ადამიანებიც, ვინც თავს სულაც არ მიიჩნევდნენ სამეცნიერო ფანტასტიკის მოყვარულებად.

შოუს დიდი გავლენა ჰქონდა ისეთ სერიალებზე, როგორებიცაა Supernatural, Lost, Fringe, Gravity Falls.

სერიალი 2016 წელს ორი ახალი სეზონით დაუბრუნდა მაყურებელს.

თუკი შენც ერთი ამოსუნთქვით უყურებ ყველა ახალგამოსულ სერიალს და ეძებ სივრცეს, სადაც შეგეძლება დაუსრულებლად განიხილო შენი საყვარელი სერიალები, მაშინ აუცილებლად უნდა შემოგვიერთდე ჯგუფში — ერთი სერიაც და...