პოლიტიკოსობა ადვილი სულაც არაა. განსაკუთრებით, მაშინ, როცა ტრიბუნაზე ხარ და შენი ოპონენტები გისმენენ. თუმცა, ეს დაძაბულობაც ხშირად იქცევა ხოლმე კომიკურ სიტუაციად.

აი, როცა დასავლეთ ვირჯინიის შტატის გუბერნატორი, ჯიმ ჯასტისი საკანონმდებლო ორგანოში წლის შემაჯამებელი სიტყვით გამოდიოდა, თავისი ოპონენტებისთვის პასუხის გაცემა ორიგინალურად მოისურვა.

"ჩვენში ეჭვი ეპარებოდათ", — განაცხადა ჯასტისმა, — "დასავლეთ ვირჯინიის არასდროს არ სჯეროდათ. ჩვენზე სამყაროში ყველაზე საშინელ ხუმრობებს ამბოდნენ".

ამის თქმა იყო და პოლიტიკოსმა თავისი ბულდოგი, სახელად ბეიბიდოგი, ხელში აიყვანა და საჯდომით კამერასა და აუდიტორიას დაანახვა.

"და სწორედ ამ პოზიციიდან, ბეიბიდოგი ბეტ მიდლერს და ყველა დანარჩენს ეუბნება, რომ ტაკოზე აკოცონ".

ბეტ მიდლერი ამერიკელი მსახიობია, რომელმაც რამდენიმე კვირის წინ დასავლეთვირჯინიელებს "ღარიბი, უწიგნური და დაჩაჩანაკებულები" უწოდა.

თუმცა, ჯასტისის ქმედებას სასესიო დარბაზში მხოლოდ კანონმდებლების სიცილი მოჰყვა.

აღსანიშნავია, რომ დასავლეთ ვირჯინიის გუბერნატორი მსგავსი "პერფორმანსებითაა" ცნობილი. ერთხელ მან შტატის ახალი ბიუჯეტის გასაპროტესტებლად მთავრობის სახლში ძროხის განავალიც კი მიიტანა.